01-03-2009, Горадня, Нёман

01-03-2009, Горадня, Нёман ад Старага маста да ратавальнай станцыі сонечна, каля 0 потым да -2С Пачаў даволі позна, прыкладна ў 14.30, але атрымалася ўбачыць і засьняць шмат цікавага. Ад старага да новага маста адзначыў 2ad+2ad+3juv лебедзя-шыпуна, палову з іх падкармлівалі хлебам (?) людзі. Качак было не шмат, большасьць каля вострава перад новым мастом: Каля 60 крыжанак і пара вялікіх савукоў. За н.мастом: вялікі савук: 8-10 птушак, шэрая чапля, каля 10 крыжанак. Недалёка, м у 15 ад сцяжынкі, якая ідзе недалёка ад вады, прачнуўся і пабег угору заяц-русак. Сьнега ў лесе амаль няма – большасьць ляжыць на сьцяжынках. Адзначыў 2-3 чорных драздоў, адзін з іх дакладна самец. Вялікі дзяцел ціхенька вылушчваў насеньне з шышак. Вялікая хеўра сініц-апалоўнікаў, каралькоў і вялікіх сініц 2 разы налятала, але зрабіць дастаткова добры фільмік не атрымалася – пераляталі за надта хутка для мяне. Але кароценькі фільмік з апалоўнікамі зрабіў – новы від на фільміках! За вастравамі мяне чакаў прыемны сюрпрыз – больш за 30 гагалёў (налічыў 31, але было можа і троху больш)! Першы раз мне пашчасьціла назіраць такую вялікую групу гэтых паўночных качак. Яны не толькі елі, час ад часу ныраючы з невялікага падскока, але і такавалі, закідваючы галовы з рэзкімі трэлямі “Взір-взір”, дакладна так, як гэта апісаў Жорж Гулеўскі ў “Кабцы”. Гукі зусім не пасавалі качкам, а сапраўды, больш нейкаму вялізнаму цвыркуну. Цікава, што ныраюць яны ў розных месцах, а вынырваюць вельмі часта амаль адзін каля другога, вада выпіхвае іх як паплаўкі! Я здымаў і здымаў – асьвятленьне было выдатнае – сонца заходзіла і падкрэсьлівала белыя шчокі і залатыя вочы самцоў. Труба праз галіны хмызоў і дрэваў дазваляла наводзіць рэзкасьць. Таму атрымалася больш за 30 фільмікаў, на якіх ёсьць харчаваньне, такаваньне ды іншыя дэталі жыцьця гэтых прыгожых качак.
Фотаздымкі

Каментары

2admin Фоткі падпісаны, але подпісы пасьля выстаўленьня не бачныя. Як ужо пісаў ОхФогель, здымкі амаль налазяць адзін на другі - было б добра іх неяк рассунуць. Ну і галоўны недахоп рубрыкі - ў Сьпісе рэгіёнаў няма Берасьцейшчыны!