Электронны Merlin “даляцеў“ да Еўропы, але радавацца яшчэ рана?

Не прайшло і тры гады, як каманда знакамітай лабараторыі арніталогіі Карнельскага ўніверсітэту (Cornell Laboratory of Ornithology) падрыхтавала сваю бясплатную праграму Merlin для вызначэння птушак па фотаздымках і для аматараў назіранняў птушак з Еўропы. Аднак, як можна здагадацца, у запакаванні праграмы для канкрэтных рэгіёнаў нашага кантыненту Усходняя Еўропа не трапіла. Што ж ёсць і якія магчымасці для вызначэння еўрапейскіх птушак дае абноўленая праграма?

Агулам функцыянал праграмы прапануе выбраць адказы на 5 простых пытанняў наконт адзначанай вамі птушкі з нейкай колькасці варыянтаў і дзякуючы ім вызначае “Ваш” від або вызначае від пасля загрузкі ў сістэму фота. Як карысны дадатак ёсць запісы галасоў многіх відаў, якія можна выкарыстаць не толькі для параўнання з пачутым голасам для вызначэння, але і каб прывабіць цікавую птушку. Таксама ёсць мапы распаўсюджання (рознымі колерамі пазначаны арэал гнездавання і зімоўкі) і невялікае слоўнае апісанне відаў.

Пасля 7 гадоў працы над праграмай, амерыканцы стварылі сапраўды цікавы інтэрактыўны сімбіёз розных магчымасцяў. І хаця распрацоўшчыкі абяцаюць у нейкай будучыні стварыць прылажэнне і для “нармальнага” кампутара, на сённяшні дзень даступныя (толькі) варыянты або для iPhone, або для смартфонаў на Android.

Найперш, перад загрузкай праграмы, трэба выбраць рэгіён, у якім мы хацелі б вызначаць звычайныя віды птушак , і выбар для Еўропы выглядае наступным чынам: Вялікабрытанія і Ірландыя – 250 відаў, Заходняя Еўропа (галоўным чынам гэта Францыя, Германія і Аўстрыя)– 383 віды, Скандынавія (Швецыя, Нарвегія, Данія і Фінляндыя) – 325 найбольш часта адзначаемыя там відаў. Зразумела, што вялікая частка відаў ва ўсіх гэтых рэгіёнах перакрываецца, але выбраць нешта для параўнання да загрузкі запакаванага рэгіёну на тэлефон немагчыма.

Пасля загрузкі і ўключэння праграмы-прылады з’яўляюцца наступныя опцыі: ‘Start Bird ID’, ‘Photo ID’, або ‘Explore Birds’. Выбраўшы першую, з’яўляецца магчымасць адказаць на 5 пытанняў наконт назірання птушкі, якую мы вызначаем без яе фотаздымка (біятоп, памер птушкі, афарбоўка і гд). У выніку прылада паказвае здымкі падыходзячых “кандыдатаў”. (Аналагічная праграма для вызначэння звычайных птушак Беларусі працуе без загрузкі ТУТ) Выбар аднаго з гэтых відаў пераводзіць да большага памерам здымка з кароткім апісаннем найважнейшых вызначальных рысаў, паводзін і пералікам асноўных месцапражыванняў. Скролінг інфармацыі пра кожны пасуючы пад наша апісанне від дае магчымасць паглядзець варыяцыі афарбоўкі, а знізу можна паслухаць голас (песню і асноўныя пазыўкі), а таксама паглядзець для пэўнасці мапу распаўсюджання.

Выбар раздзелу ‘Explore Birds’ дазваляе карыстальнікам выбраць канкрэтныя сямействы або віды самастойна і паглядзець інфармацыю пра іх.

Аднак самым папулярным хутчэй за ўсё стане прылада па распазнаванні відаў па канкрэтных здымках, зробленых карыстальнікамі непасрэдна “ў поле”. Гэтая функцыя значна дадала ў якасці вызначэння прыкладна год таму, калі палепшалі агульныя кампутарныя тэхналогіі распазнавання малюнкаў.

Для гэтага неаьходна зрабіць выбар паміж ‘Take Photo’ або ‘Choose Photo’, - першы аўтаматычна ўключае камеру на тэлефоне, другі дазваляе выбраць ужо зроблены здымак. Чорны прамавугольнік дазваляе выбраць на здымку канкрэтную птушку. Пасля ўводзім дату і месца, дзе зроблены здымак, і нам прапнуюцца здымкі найбольш імаверных відаў-кандыдатаў, адпаведных птушцы на фота. Найбольш пасуючы від знаходзіцца зверху спісу. Калі Вы лічыце, што птушка вызначаная правільна і націскаеце на адну з прапанаваных птушак ‘Yes, This Is My Bird’, вынік аўтаматычна дасылаецца ў базу Мерліна для паляпшэння наступных вызначэнняў. Калі ж выбраць кнопку ‘No Match’, можна выбраць тую самую птушку і паспрабаваць вызначыць яе яшчэ раз праз нейкі час.

Аднак важна падкрэсліць, што правільнае вызначэнне магчымае толькі па фота адпаведнай якасці. Калі ж здымак нярэзкі або далёкі і наша вока няздольнае правільна разабраць характэрныя для вызначэння рысы, то гэта тым больш не зможа зрабіць праграма! Калі ж здымак адпаведнай якасці, то правільнасць вызначэння ацэньваецца аўтарамі прылады ў прыкладна 90%.

Таксама зразумела, што для выкарыстання праграмы ў поле для здымкаў хаця б дастатковай для вызначэння якасці трэба або выкарыстоўваць діджыскопінг з камерай тэлефона (phonescoping), або рабіць здымкі тэлефонам з маніторчыка нармальнай фотакамеры. Гэта не вельмі зручна, тым больш у адсутнасць магчымасці праглядзець ці падгрузіць здымкі пазней на маніторы кампутара.

птушкі

Сфатаграфаваную тэлефонам праз трубу канадзкую казарку ў групе белашчокіх праграма не вызначыла, прапанаваўшы на першым месцы як магчымы від … шэрую курапатку.

Варта не забываць, што Merlin усё яшчэ развіваецца і ўдасканальваецца – ў тым ліку і дзякуючы карыстальнікам! На сённяшні дзень праграма выкарыстоўвае для вызначэння ўжо больш мільёна здымкаў птушак.

Цікава дадаць, што ў выпадках вызначэння заляцелых у Еўропу амерыканскіх відаў, праграма хутчэй за ўсё будзе як найбольш дарэчнай.

Цяпер у базе Merlin’а дадазеныя пра 2.126 відаў птушак Паўночнай і часткова Паўднёвай Амерыкі і Еўропы, прычым сярод іх 4.766 гукавых файлаў.

Новыя магчымасці, якія з’явяцца ў праграме ў будучыні – санаграмы песняў і іншых гукаў птушак, а таксама сустрэчы блізкіх ці падобных відаў на аснове дадзеных eBirds канкрэтна для дадзенай мясцовасці.

 

Паводле www.birdguides.com (частка тэксту і скрыншоты) падрыхтаваў Дзьмітры Вінчэўскі

 

 

На гэтую тэму:

НАЗІРАННІ ЗА ПТУШКАМІ Ў ЗША Ў ЛІЧБАВУЮ ЭРУ

Merlin дапаможа вызначыць амерыканскіх птушак па фота

Праграма для iPhone дазволіць амерыканцам вызначаць птушак навокал

НОВЫ МЕТАД АЦЭНКІ ПАМЕРУ ПАПУЛЯЦЫЙ ПТУШАК ПА ІХ ГАЛАСАХ

 

Comments

Определять программой птиц по фото - это по-моему, перебор. Так люди сами думать/анализировать перестанут. Можно было бы ограничиться разными критериями поиска по базе и сравнением с другими фото

Прыкладна так праграма і працуе- выдае невялікі спіс відаў, з фота якіх, апісаннем і мапамі можна параўнаць свой здымак і іншыя дадзеныя-  дзе і калі ён зроблены, у якім біятопе і гд.

Алн згодны, што наўрацці гэта прыцягне да назіранняў птушак - такіх, як мы іх разумеем.