Рыбгас "Трэмля"

    Сення з раніцы яшчэ быў на рыбгасе "Трэмля" што ў Петрыкаўскім раёне Гомельшчыны. Рыбгас не вельмі буйны, калі параўноўваць напрыклад з "Белым" ці "Чырвонай слабадой", дзе я зараз і знаходжусь. Але на яго ставах можна паназіраць шмат за якімі рэдкімі птушкамі. Есць у яго і свае адметнасці. Ізюмінкай "Трэмлі" з'яўляецца марадунка Xenus cinereus, гэтаксама як напрыклад луток для "Белага".

 Існуе  меркаванне, што калі вы схочыце пабачыць марадунку, вам абавязкова трэба ехаць на Тураўскі луг. Гэта быццам бы лепшае месца для назірання за гэтым відам. Але я гатовы абспрэчыць гэтае сцверджанне. А калі вы не ў змозе пераадолець сумневы, завітайце на "Трэмлю" і пераканайцеся, што восьмы пруд нагульнай сістэмы улюбенае месца гэтай паўночнай птушкі. У гэтым годзе гнездаванне марадункі было заўважана мною толькі на 2 ставах, у той час як у мінулым годзе яна гнездавала на 4, усяго адзначана 2 пары з птушанятамі  і 7 тэрытарыяльных пар.

 Яшчэ адна птушка, у жыцці якой значную ролю маюць ставы рыбгаса гэта шэрашчокая коўра Podiceps grisegena. На "Трэмле" яе лічэбнасць дасягае 20 пар, што калі верыць апошняму выданню Чырвонай кнігі Беларусі складае 20% усей беларускай папуляцыі гэтага віду.

Трэмля гэта бадай што адзіны рыбгас на Беларусі, дзе гняздуе крывок HAEMATOPUS OSTRALEGUS. У мінулым годзе мне пашчасціла знайсці гняздо гэтай птушкі, якое яна зрабіла якраз на дамбе паміж двума прудамі. За апошнія трое сутак, што я правеў на рыбгасе мне атрымалася адзначыць 3 пары паручайніка TRINGA STAGNATILIS, некалькі пар вялікага грыцука Limosa limosa. самку даўганосы савук MERGUS SERRATOR, вялікага бугая BOTAURUS STELLARIS, арлана белахвоста HALIAEETUS ALBICILLA, чорнага бусла CICONIA NIGRA, баталенаў PHILOMACHUS PUGNAX, чайку чарнакрылку Larus Fuscus, а таксама некалькі каленій комплекснай Larus argentatus/cochinnans і шызай чайкі LARUS CANUS, белашчокай рыбачкі CHLIDONIAS HYBRIDUS. 

 У каленіях гняздуецца шмат малых, вялікіх і чорнашыіх коўр. Пакуль лічыў гнезда комплекснай чайкі знайшоў некалькі гнезд малой коўры. Ля аднаго з іх я заўважыў гэтую маленькую істоту . Нагадвае нейкага пінгвіненка . . .

Учора ў вечары калі ішоў па дамбе знайшоў маленькую змуміфікаваную балотную чарапаху EMYS ORBICULARIS.