Знакаміты рукапіс з сярэдзіны ХІІІ стагоддзя нядаўна дазволіў новым яго даследчыкам зрабіць чарговае адкрыццё - у ім былі знойдзены ажно 4 арыгінальныя малюнкі жоўтачубага аўстралійскага какаду (Cacatua sulphurea)!
Рукапіс стварыў паміж 1241 і 1248 гг. адзін з заснавальнікаў арніталогіі як навукі Фрыдрых ІІ Гогенштаўфен, кароль Сіцыліі і імператар Свяшчэннай Рымскай імперыі пад назвай De Arte Venandi cum Avibus (Мастацтва палявання з птушкамі); кніга захоўваецца ў Ватыканскай бібліятэцы.
Цікава, што гэтае адкрыццё адсоўвае першыя вядомыя нам звесткі пра какаду ў Еўропе на 250 гадоў назад, бо папярэдняя дата - 1496 год - адносілася да карціны "Madonna della Vittoria", напісанай Andrea Mantegna.
Навуковы артыкул пра какаду на гэтай карціне быў апублікаваны ў 2014 годзе і дзякуючы яму трое фінскіх студэнтаў, якія ў Ватыкане вывучалі рукапіс Фрыдрыха ІІ, звярнулі ўвагу на нашмат ранейшыя малюнкі какаду.
Гэтыя каляровыя і даволі дакладныя малюнкі дазволяюць нават вызначыць від як жоўтачубы какаду і такім чынам вызначыць магчымае паходжанне птушкі з астравоў Інданезіі, Новай Гвінеі або поўначы Аўстраліі.
Паводле тэксту пад адным з малюнкаў, птушку падарыў імператару султан Егіпта. Такім чынам, ужо ў Сярэднявеччы папугаі былі каштоўнымі падарункамі, бо плаванне ад Інданезіі да Каіра ў тыя часы магло заняць не менш некалькіх гадоў.
Публікацыя пра адкрыццё з'явілася ў чэрвенскім нумары часопіса Parergon Journal (35/1 (June 2018): 35-60).
Паводле www.phys.org (тэкст і малюнак) падрыхтаваў Дзьмітры Вінчэўскі
На гэтую тэму:
Распаўсюджанне каралінскага папугая адноўлена праз 100 гадоў пасля знікнення віду
Выратаваць аўстралійскіх папугаяў
Філу Коллінзу не было б сорамна за какаду
Рэкордны кошт рэкорднай кнігі
- Увайдзіце ці зарэгіструйцеся каб пакідаць каментары.
КАМЕНТАРЫ