Гілі рыхтуюцца да вясны?

Дакументацыйныя здымкі

Прыкладна апошні месяц гілёў (Pyrrhula pyrrhula) я бачу ў горадзе штодзень, часта ў 2-3 месцах. І звычайна яны занятыя сваёй асноўнай справай - ядуць пупышкі на розных дрэвах. Калі раней гэта былі толькі т.зв. пладовыя дрэвы ў садах, то пры  набліжэнні вясны колькасць відаў, на якіх пупышкі памерамі і смакам задавальняюць гілёў, паступова павялічваецца.

Вось і ў гэты дзень самка гіля, якая сядзела на самай вершаліне высокага дрэва, не была маёй першай сустрэчай з відам. Я думаў, што яна есць там пупышкі, але на ўсялякі выпадак зрабіў здалёк некалькі здымкаў. І моцна здзівіўся, калі на маніторы кампутара ўбачыў, што пупышак на галінках, дзе сядзела самка гіля, амаль няма. А яна там адламвала нейкія старыя і яўна сухія галінкі ці пладаножкі. З-за таго, што птушка нікуды іх не адносіла, я думаю, што яна проста трэніравалася збіраць матэрыял на гняздо і адламаўшы, кідала яго ўніз.

Працягвалася гэта нядоўга і праз прыкладна хвіліну самка гіля адляцела.

Гродна, 28-02-2024

Аўтар - Дзьмітры Вінчэўскі