Маладыя мухалоўкі (а страказу шкада...)

09.07.2022, Гомельскі раён, Дняпро

Дзень быў багаты на птушыную драбязу - паўсюль нешта гучала і нехта пералятаў. На беразе я спынілася, каб паспрабаваць падлавіць якую пячураўку ці сініцу - і тыя, і гэтыя мільгалі ў вербах ніжэй па схіле - але тут заўважыла ў тых жа вербах пару слёткаў, то пачала прыглядацца, што за яны і ці не з'явіцца хтосьці з бацькоў, каб атрымалася апазнаць.

Ну, пакуль чакала бацькоў, то заўважыла і падазрона знаёмыя палоскі на лобе...

За тыя дваццаць хвілін, што я глядзела, дарослыя мухалоўкі прыляталі тройчы (таксама прыляталі пячураўкі, гаічкі, зноў пячураўкі і шчэ раз пячураўкі; фонавыя спевы істотаў, якія залезлі ў самы недасяжны вербалоз, прыведзеныя ніжэй).