Крапіўнікі: перадзімовыя заляцанні

Усе ведаюць пра тое, што нават у каланіяльных птушак ёсць свае тэрыторыі - хаця б мінімум месца вакол уласнага гнязда. А ў тэрытарыяльных птушак звычайна тэрыторыі утрымліваюцца пад час гнездавога сезону- каб было дастаткова месца і рэсурсаў на ім для паспяховага размнажэння. Пасля гэтага падобную ці іншую тэрыторыю наўрацці ёсць сэнс актыўна бараніць ад іншых прадстаўнікоў свайго віду, бо энергіі на гэта будзе траціцца больш, чым  магчыма атрымаць ад тэрыторыі.

У мінулую зіму крапіўнікі (T. troglodytes) парамі (?) або асобна перазімоўвалі ў Гродна ў пойме Нёмана ад чыгуначнага маста і ніжэй па плыні кожныя 50-60 метраў. І я нават не думаў, што яны гэтыя тэрыторыі нейкім чынам бароняць ад іншых, хаця гэта было б лагічгна, калі ўлічыць абмежаваную колькасць даступных ім каля вады насякомых. 

Пасля першага сёлета сапраўднага пахаладання ў старога маста я пачуў і ўбачыў двух крапіўнікаў, якія актыўна перамяшчаліся па кустах і невысокіх дрэўцах у вады і адзін (?) з іх часта і гучна трашчаў - аднойчы нават так актыўна, што напалохаў сінюю сінічку)

Я думаў, што адна птушка праганяе і няможа прагнаць іншую, але пасля прагляду здымкаў на кампутары зразумеў, што тут нешта больш складанае.

Па-першае, аказалася, што адзін з крапіўнікаў амаль увесь час знаходзіўся каля іншага... з апушчаным хвосцікам!

Хутчэй за ўсё гэта і быў "крыкун" ці "трашчун. А побач з ім прыгала і перамяшчалася птушачка з "нармальным", удзёрнутым да гары хвастом:

Ці самец такім чынам прыцягваў увагу самкі і паказваў магчымую зімовую тэрыторыю якую ён быў гатовы абараняць ад іншых? Вельмі магчыма, бо потым, калі я вяртаўся праз хвілін пяць, адзін з карпіўнікаў спяваў у вербалозе прыкладна ў месцы, з якога раней пачаўся траскучы пералёт ўздоўж ракі.

Гродна, 28-10-2019

Аўтар - Дзьмітры Вінчэўскі

Вось як выглядалі гэтыя "перадзімовыя заляцанні":