Малыя грычуны: другі заход?

13.07.21, Гомель, хмызнякі за Давыдаўкай

Цягам апошняга тыдня малых грычуноў было неяк ...вельмі бачна: як ні прайдуся ўвечары па дарозе да могілак - так двое-трое-чацьвёра і сустрэнуцца. Штопраўда, з фатаздымкамі ня вельмі шанцавала, бо аніяк не атрымлівалася адолець святло. Ці, як вось сёння, адлегласць.

Ілюстрацыйнае, з розніцай у некалькі дзён: самец і самка кагосьці ядуць на адным і тым жа дрэве...

...На кусце (тып "вельмі малая вярба") сядзеў малы грычун і махаў хвастом. І нават ...верагодна, спяваў. Нешта чырыкаў, дык дакладна. Ну, нехта нешта чырыкаў.

За працэсам з куста насупраць (тып "ужо нішто сабе вярба") назірала сарока. Якая ж яна велізарная!

(На жаль, паміж мной і грычуном было колькі метраў зараснікаў, у якія я не палезла, дый увогуле абраць пазіцыю ландшафт ...ня дужа дазваляе)

Праз пэўны час на кусце насупраць намалявалася самка. Самец працягваў спяваць і махаць хвастом, самка круцілася непадалёк, і ўсё гэта вельмі нагадвала заляцанні, то мяркую, яны і былі.