Качка-крыжанка і адно качанё

Нядаўна я расказваў пра сустрэчу з зусім невялікім як для качак-крыжанак (Anas platyrhynchos) вывадкам з 4 качанят.

І вось у тое ж месца, вусце Гараднічанкі, заплыла самка з яшчэ меншым, які складаўся ...з аднаго малога!

Яны плылі ўверх па рацэ, а значыць, супраць плыні і качанё яўна замарылася, бо ўвесь час старалася не адстаць ад мамы.

Мама вырашыла трошкі адпачнуць і заплыла ў Гараднічанку, а там яны абодва выбраліся на суседнія камяні. Але адпачынак працягваўся толькі каля хвліны і калі самка працягнула падарожжа, качанё вымушана паплыло за ёй. 

Потым самка то разварачавлася і хацела вярнуцца, то плыла ў Нёман. А малое не ведала яе планаў, яму цяжка было зразумець гэтыя манеўры і яно натыкалася на маму пад час змены курсу, але старалася трымацца побач. Так, разам, яны і адплылі ў большую раку.

03-07-2021, Гродна

Аўтар - Дзьмітры Вінчэўскі