Адзіны

Незразумела чаму, але качкі-крыжанкі (Anas platyrhynchos) у гарадах чамусьці размнажаюцца выразна пазней, чым іх таваркі на іншых тэрыторыях. А для больш позніх выпадкаў гнездавання добра вядома аднолькавая для розных відаў птушак заканамернасць - чым пазней у сезоне адбываецца размнажэнне, тым менш птушанят атрымліваецца 'падняць на крыло' нават у паспяховых вывадках. Таму параўнальна невялікія вывадкі крыжанак, якія сустракаюцца ў гарадах на прыканцы вясны - у пачатку лета справа заканамерная. І з цягам часу, асабліва ў першыя пасля вылуплення качанят дні, на жаль, іх колькасць часта змяншаецца і змяншаецца. Але вось так каб убачыць самку качкі-крыжанкі з адным качанём у мяне атрымалася гэтым летам упершыню.

Я чакаў паздымаць розныя віды птушак у вусці Гараднічанкі, калі даволі хутка шырокі тут і хуткі Нёман бокам да яго плыні перасяклі дзве качкі - дарослая самка качкі-крыжанкі і яе адзінае птушанё ўзростам прыкладна з тыдзень. Качанё ўвесь час старалася трымацца недалёка за мамай, хаця ў некаторых месцах з моцнай плынню яму гэта давалася яўна з цяжкасцю. А калі гэтая невялікая сям'я ужо выплыла на плыткае месца ў вусце Гараднічанкі, малое пачало выдатна капіраваць спосабы харчавання мамы: перакульвацца ў вадзе ўніх галавой і даставаць вялікія кавалкі водных раслін і вадаростаў, а часам і нешта іншае, ці фільтраваць воду ў пошуках дробнй ежы. 

Тут таксама адлегласць паміж птушкамі заставалася невялікай, хаця ніякай гіперапекі з боку мамы я не ўбачыў: усё адбывалася роўна і як і ў іншых качыных сем'ях з большай колькасцю качанят. Можа толькі калі малое хацела пабыць зусім побач, яно без цяжкасці і канкурэнтаў - іншых птушанят - магло гэта зрабіць у любы час. 

Пачалася гэтая гісторыя 22.06, а потым прыкладна ў той самы час у наступныя дні я назіраў тое самае: мама з качанём пераплывала Нёман і харчавалася або адпачывала разам з ім у вусці Гараднічанкі. Ажно птушанё расло і ўсё больш змяняла доўгі і густы пух на пер'е, усё больш і памерамі, і афарбоўкай станавілася падобным да мамы. І вось 02.07 я ўбачыў выразную змену паводзін - падрослае качанё ўжо не плыло за мамай ці побач збоку ад яе, а часта і свабодна абганяла і плыло наперадазе, а дарослая качка старалася трымацца побач з патомкам на невялікай адлегласці ад яго. 

Гродна, 22.06 - 02.07.2023

Аўтар - Дзьмітры Вінчэўскі