Чарнагаловыя шчыгелы: Даеш новыя, вялікія дзьмухаўцы!

Хаця там, дзе была магчымасць і дзьмухаўцы раслі доўга і таму іх насенне паспела толькі на прыканцы мая, чорнагаловыя шчыгелы (Carduelis carduelis) знаходзілі і ахвотна елі іх ‘парашуцікі’, аднак усё добрае некалі заканчваецца. Нават калі яно цягнулася ажно з канца красавіка – гэта значыць, каля месяца.

Але як раз у гэты час падаспела замена – паспела насенне ў лугавога (?) казлабарода (Tragopogon pratensis), які мае вельмі падобныя на дзьмухаўцовыя пушыстыя шарыкі. І хаця казлабароды не тaкія ж шматлікія і шырокараспаўсюджаныя, але яны ‘бяруць’ не колькасцю насення – вельмі падобных ‘парашуцікаў’, а іх велічынёй. Таму і любяць іх шчыгелы яўна не менш:

Пасля пачатку ‘сезону казлабародаў’, амаль штодня бачу шчыгелаў, якія харчуюцца на іх. І амаль заўсёды гэта пары птушак – больш вачэй і вушэй для хуткай і адпаведнай рэакцыі на небяспечную сытуацыю. І не менш важна, што і партнёр для другога гнездавання ў гэтым сезоне застаецца пад пастаянным наглядам)

Гродна, 08-06-2023

Аўтар – Дзьмітры Вінчэўскі