Лугавы ерчык і загадкавае 'такаванне'

Першага свайго сёлетняга лугавога ерчыка (Saxicola rubetra) я заўважыў на не зусім звычайнай для віда прысадзе. Гэта былі верхнія пабегі параўнальна высокага вяза. Дзякуючы таму, што лісце на ім толькі пачало распускацца, птушка і яе паводзіны былі добра бачныя. І гэтыя апошнія здзівілі мяне.

Час ад часу ерчык невысокай 'свечкай' узлятаў метры на 2-3 і прызямляўся побач, звычайна недзе зверху. Што гэта - такаванне? Але я да гэтага бачыў вельмі шмат ерчыкаў і не помніў у іх падобных паводзін. Ніякіх гукаў птушка пры гэтым не выдавала, але палёты працягваліся.

І вось, прыкладна праз паўгадзіны, я ўбачыў 'адгадку' - ерчык у паветры схапіў жука і прязмліўся, каб яго з'есці!

Атрымліваецца, што ўвесь гэты час ён паляваў на насякомых, якія праляталі побач. А з-за адлегласці і слабага зроку я іх проста не бачыў)

01-05-2022, Гродна

Аўтар - Дзьмітры Вінчэўскі