Нейкі час я не наведваў Нёман ля вострава і не ведаў, што там можна назіраць цікавыя падзеі. І вось на працягу паўгадзіны для таго, каб стаць іх сведкам, мне нават не прыйшлося спускацца да ракі - усё можна было глядзець і здымаць зверху, з дарогі.
Яшчэ калі я толькі падыходзіў да вострава перад т.зв. новым мастом, я заўважыў трох вялікіх белых чапляў ((Egretta) Ardea alba), якія стаялі недалёка адна адной на валунах. І вось адна з іх пераляцела ў пачатак затокі, якая агібае востраў з аднаго боку і пачала рыбачыць. Але яна аказалася там не адна - хутка я ўбачыў у той жа затоцы і шэрую чаплю (Ardea cinerea).
Спачатку здавалася, што канфлікту паміж чаплямі не будзе - невялікую рыбку злавіла шэрая чапля, а праз некалькі секунд і белая. Потым яны даволі блізка адна ад адной разыйшліся ў супрацьлеглых кірунках, але прыкладна на цэнтр затокі прыляцела яшчэ адна белая чапля. І тады шэрая не вытрымала - зрабіла кароткі ўзлёт-выпад на яе і белая адляцела прыкладна на такую ж невялікую адлегласць. У шэрай не засталося выбару і каб яе напад быў успрыняты сур'ёзна, прыйшлося ўзлятаць і нападаць на белую яшчэ раз, больш рашуча - усе гэтыя моманты добра бачныя на здымках ніжэй.
Але гэта быў толькі пачатак 'абароны затокі'...
Працяг будзе
Гродна, 11-10-2026
Аўтар - Дзьмітры Вінчэўскі
- Увайдзіце ці зарэгіструйцеся каб пакідаць каментары.
КАМЕНТАРЫ