Сярэдні дзяцел на дубе

Дакументацыйныя здымкі і відэа

У самым ненатуральным скверыку адпаведнага памеру хутчэй за ўсё ёсць свой сярэдні дзяцел (Dendrocopos medius). Ён калі і не жыве там круглы год, то прылятае з рэгулярнымі праверкамі - што і дзе змянілася сярод дрэваў і як гэта можна выкарыстаць?  

Таму нічога дзіўнага ў тым, што я сустракаю час ад часу сярэдняга дзятла ў скверыку на супрацьлеглым беразе, няма. Там амаль адсутнічаюць сухія і яўна хворыя дрэвы - 'Зелензруб' сочыць і спілоўвае (але не ўсе - не паспявае?), няма і старых дрэваў. Але ёсць не вельмі маладыя дубы, на самым тоўстым з якіх я і сустрэў дзятла ў сярэдзіне восені: птушка правярала складкі дубовай кары на насякомых і павучкоў, якія маглі там схавацца:

Але ці то такіх безхрыбетных у складках і шчылінках было яшчэ няшмат, або яны, наадварот, ужо добра схаваліся і дастаць іх было цяжкавата нават дзятлу, але пасля двухвіліннага даследавання ён адляцеў.

Гродна, 11-10-2024

Аўтар - Дзьмітры Вінчэўскі