Восеньскія шпакі

Дакументацыйныя здымкі і відэа

На прыканцы бабінага лета і пасля саліднага перапынку прыкладна з сярэдзіны лета навокал ізноў становяцца бачныя вялікія колькасці шпакоў (Sturnus vulgaris). І самае цікавае,што не толькі бачныя, але ізноў, як і вясной, паўсюль чутны іх спевы, сярод якіх можна лёгка пазнаць і сумныя крыкі канюха-мышалова, і прыгожыя свісты авяльгі часам ад аднаго і такого ж імітатара.

У адрозненне ад вясны, зараз шпакі могуць выбіраць для спеваў зусім ужо дзіўныя месцы - гэта і зразумела, таму што вясной яны спевамі прыцягваюць увагу партнёра да добрага дупла ці іншай гнездавой нішы, а таксама дэманструюць патэнцыйным супернікам, што месца гнездавання ўжо занятае.

Не магу ўспомніць нават блізка падобны наш від вераб'іных птушак, дарослыя асобіны якога б так знешне мяняліся б з вясны да зімы, ды яшчэ маладыя шпакі дадаюць сваім пераходным апярэннем блытаніны.

https://youtu.be/yDn3QFdB5Tc

Прайдзе яшчэ нейкі час, і большасць шпакоў адляціць на зіму, але ў апошнія гады вельмі павольна колькасць тых, што вырашылі застацца, павялічваецца практычна па ўсёй краіне.

04-05.10.2020, Гродна

Аўтар - Дзьмітры Вінчэўскі

__________________________-