Чорны дрозд: З поўнай дзюбай

Дакументацыйныя здымкі

Я ўжо вяртаўся дахаты, як збоку на беразе рэчкі ў высокую траву з дзьмухаўцамі сеў шпак. Прыкладна тыдзень таму ў многіх шпакоўнях пачалі вылупляцца птушаняты і дарослыя птушкі паўсюль шукаюць для іх ежу.

Але калі я прыглядзеўся да птушкі побач са мной, яна аказалася самцом чорнага дразда (Turdus merula). Ён таксама прыляцеў збіраць ежу для птушанят і рабіў гэта хутка і спраўна. Высокая трава не дазваляла ўбачыць працэс даставання з глебы дажджавых чарвякоў, але іх колькасць у дзюбе пастаянна павялічвалася. Дрозд са здабычай прыгаў на новае месца, клаў чарвякоў побач з сабой, даставаў новых і падбіраў 'старых'. І ўсё раз за разам паўтаралася.

За пяць хвілін самец назбіраў поўную дзюбу і адляцеў. А я ўспомніў самку чорнага дразда - яна на апошнім здымку, якую ўчора назіраў зусім недалёка ад гэтага месца. Яна таксама займалася пошукам ежы, але на ўчастку са скошанай травой і за прыкладна той жа час нічога не знайшла і адляцела пустой)

08 і 09-05-2023, Гродна

Аўтар - Дзьмітры Вінчэўскі