Гарадзкія ластаўкі: City life, ч.II

Працяг гісторыі. Пачатак ТУТ

Каб збудаваць трывалае гняздо з гразі і сліны, аднаго гэтага будаўнічага матэрыялу ластаўкам аказваецца мала. Гарадзкія ластаўкі (Delichon urbicum) выкарыстоўваюць раслінны матэрыял гэтаксама, як гэта робяць і вясковыя, толькі ў гнёздах апошніх гэта лепш бачна. Ну і не варта забываць, што сухая і тонкая расліннасць патрэбная для высцілкі ўжо гатовага гнязда.

Некаторыя з птушак, каб не лятаць двойчы, прылятаюць за кавалачкамі гразі з ужо падабранымі травінкамі, але гэта адбываецца нячаста - усё ж розны па структуры матэрыял лепш збіраць і выкарыстоўвываць асобна. І тады, звычайна недалёка ад месца гнездавання, можна назіраць хвалі налётаў ластавак за расліннасцю. І яны вельмі падобныя да налётаў за граззю: спачатку птушкі некалькі разоў нізка пралятаюць над патэнцыйным месцам збору травінак і калі ўпэўняцца, што там бяспечна, сядаюць туды адна за адной.

Але і тут ёсць свае нюансы - частка птушак падбірае ўжо гатовы гнездавы матэрыял, частка ж стараецца вырваць яго з зямлі самастойна, для чаго часам прыходзіцца абапірацца на хвост і выкарыстоўваць крылы каб пацягнуць сцяблінкі мацней. Чаму вырваць нешта самастойна так важна для ластавак, я пакуль што не разумею, але ў гэтым удзельнічаюць часам адначасова па некалькі птушак.

Гродна, 06-08.06.2026

Аўтар - Дзьмітры Вінчэўскі