Аўстралійскія белыя ібісы (Threskiornis molucca) навучыліся ‘паласкаць’ марскіх рапух (Rhinella marina) перш, чым праглынуць іх цалкам. Магчыма, што гэты абарыгенны аўстралійскі від птушак дапаможа прыпыніць ці хаця б запаволіць працэс распаўсюджання небяспечнага для мясцовай фауны інвазійнага чужароднага віда амфібій.
Белы ібіс – параўнальна шматлікі і шырокараспаўсюджаны від птушак у Аўстраліі. Яны сустракаюцца не толькі ‘ў прыродзе’, але і ў многіх паселішчах чалавека, дзе харчуюцца разнастайнай жывёльнай ежай. Нядаўна гэтыя птушкі ўпершыню былі заўважаныя пад час “гульняў” з марскімі рапухамі. Аднак калі Emily Vincent з прыродаахоўнага таварыства Watergum больш уважна паглядзела відэа з раней невядомымі для гэтага віду паводзінамі, то аказалася, што ‘гульні’ звязаны з паяданнем рапух і перш, чым праглынуць амфібій, ібісы стараюцца ачысціць іх ад скураных выдзяленняў.
Марскія рапухі – параўнальна вялікія памерамі амфібіі, якія паходзяць з Цэнтральнай і Паўднёвай Амерыкі, а ў Аўстралію былі завезены ўпершыню ў 1935 годзе, спецыяльна разводзіліся і выпускаліся на плантацыях цукровага трыснягу на ўсходзе краіны. Лічылася, што яны дапамогуць танна і эфектыўна змагацца з абарыгенным жуком, які ахвотна ўключыў гэтую сельгаскультуру ў сваё меню. Тым не менш, без прыродных ворагаў гэтыя інтрадуцэнты праз некалькі гадоў пачалі вельмі хутка павялічваць сваю колькасць – зараз памер іх папуляцыі ацэньваюць у 2 мільёны дарослых асобін. А таксама самастойна і паспяхова распаўсюджваюцца з усходняга ўзбярэжжа Аўстраліі на захад і поўдзень кантыненту з сярэдняй хуткасцю каля 50 км у год.
Спецыяльныя залозы на спіне марскіх рапух у выпадку небяспекі выдзяляюць яд. Жывёлы, на скуру ці ў ратавую поласць якіх трапіць гэтае атрутнае рэчыва, хутка паміраюць ад астаноўкі сэрца. Атрымліваецца, што менавіта гэтага ібісы і стараюцца пазбегнуць. “Птушкі, якія злавілі рапуху, пераварочваюць яе дагары нагамі, падкідваюць у паветры. Пасля гэтага ібісы заўсёды стараюцца выцерці скуру рапух аб мокрую траву ці нясуць у бліжэйшую калужыну ці ручаіну, дзе старанна ‘палошчуць’” – сказала Vincent.
Яна лічыць, што птушкі выпрацавалі метад “напалохай, выпалашчы і паўтары” у адносінах да рапух, каб такім чынам пазбавіць амфібій эфектыўнай, але пасіўнай абароны і потым з’есці.
Цікава, што іншыя аўстралійскія птушкі, такія як мясцовыя чорныя каршуны і вароны, прыдумалі і выкарыстоўваюць іншы спосаб як бяспечна для сябе з’есці рапуху. Звычайна гэтыя птушкі пераварочваюць амфібію на спіну і потым выядаюць яе неабароненыя і пакрытыя тонкай скурай часткі цела знізу.
Прафесар Rick Shine з Macquarie University сказаў, што ібісы вылучаюцца не толькі спосабам, якім пазбягаюць дзеяння атруты, але і тым, што яны першы вядомы від драпежніка, які праглынае рапух цалкам.
Паводле www.bbc.com падрыхтаваў Дзьмітры Вінчэўскі
Здымак з https://mdahlem.net
На гэтую тэму:
Драпежныя птушкі могуць пераносіць агонь, каб ім выпалохваць сабе здабычу!
Незвычайнае адкрыццё: сокалы Элеаноры назапашваюць жывую здабычу!
- Увайдзіце ці зарэгіструйцеся каб пакідаць каментары.
КАМЕНТАРЫ