Ці атрымалася выратаваць каліфарнійскіх кондараў (Gymnogyps californianus), самых вялікіх прадстаўнікоў сучасных драпежных птушак? На гэтае пытанне пакуль няма ўпэўненага адказу, аднак нават мінімальна запланаваныя паказчыкі яшчэ не дасягнуты.
Сёлета ў мае іх колькасць перакрочыла за 4 сотні асобін. Аднак толькі 226 з іх жывуць у дзікай прыродзе: 125 у Каліфорніі, 80 у Арызоне і 21 у штаце Baja ў Мексіцы. Акрамя гэтых птушак, 179 кондараў жывуць у няволі, дзе ўдзельнічаюць у разнастайных праграмах па размнажэнню. Пасля ветэрынарнага кантролю частка іх будзе рэінтрадуцыравана ў прыроду. Аднак мэтай праграмы па рэінтрадукцыі віду з’яўляецца нашмат большая лічба, бо навукоўцы лічаць, што як мінімум патрэбныя 450 птушак у прыродзе, каб папуляцыя магла стаць устойлівай і самападтрымлівацца.
Калі ж успомніць гісторыю змагання за выратаванне віду, сённяшнія лічбы ў 400 птушак можна прызнаць вялікім дасягненнем. Бо ў 1982 годзе ў жывых заставаліся толькі 22 птушкі. Амерыканскі Peregrine Fund распачаў праграму па размнажэнню кондараў у няволі ў 1983 годзе. Праз тры гады пачаўся выпуск птушак у прыроду ў адным месцы ў Паўночнай Арызоне – на кліфах Vermilion.
Апошнія гады галоўнай перашкодай ва ўзнаўленні папуляцыі каліфарнійскіх кондараў застаецца іх атручванне свінцовым шротам. Птушкі праглатваюць яго разам з кускамі падалі ад падстрэленых паляўнічымі жывёл. Паступова свінец раствараецца ў тканях і прыводзіць да гібелі кондараў.
Здымак з www.dfg.ca.gov
Паводле www.wildlifeextra.com падрыхтаваў Дзьмітры Вінчэўскі для www.birdwatch.by
- Увайдзіце ці зарэгіструйцеся каб пакідаць каментары.
КАМЕНТАРЫ