Шпакі і бузіна

Хаця шпакам (Sturnus vulgaris) і нецяжка адрываць ягады бузіны, і лёгка праглынаць іх, чамусьці яны не вельмі часта прыляталі падхарчавацца імі.

У большасці выпадкаў гэта былі адзінкавыя птушкі і паводзілі яны сябе вельмі асцярожна і ціха, што зусім непадобна да шпакоў у іншых сытуацыях. Часам прыляталі і невялікія групкі з 3-5 шпакоў і тады здараліся і непрацяглыя 'разборкі', хаця ягад навокал было дастаткова нават для сотняў шпакоў. І толькі аднойчы чародка з прыкладна 20 шпакоў завярнула і села пад'есці бузіны  такім вось большым складам.

Чаму шпакі не вельмі цікавіліся ягадамі бузіны, я так і не зразумеў. Ці то смак іх падабаўся далёка не ўсім птушкам, ці то іншай, больш даступнай і пажыўнай ежы хапае, але ў адрозненне ад рудахвостак-чарнушак і чорнагаловых лесак, ягады бузіны яўна не сталі папулярнай ежай для шпакоў.

22 і 25-08-2021, Гродна

Аўтар - Дзьмітры Вінчэўскі