Перасяленне крапіўніка

Адліга пачалася нечакана, як часцей за ўсё бывае пасля таго, як марозы і снег валодаюць усім навокал, акрамя бягучай вады ў рэчках і рэках. Ужо праз два дні снег знік амаль паўсюль..

Я ўжо амаль выйшаў са скверыка на тым беразе, калі яшчэ здалёк пачуў гучны ў зімовай цішыні трэск крапіўніка (Troglodytes troglodytes). Але птушка трашчала не непасрэдна з берагу ракі, ад вады, дзе яны звычайна займаюць зімовыя тэрыторыі, а метраў 30 вышэй. Тут бераг мае шмат крыніц і невялічкіх ручаінак, невялікі ўхіл, а таксама рэшткі расліннасці, у якой можа тэарэтычна схавацца не адна сотня крапіўнікаў. 

Калі я падыйшоў бліжэй, крапіўнік і не думаў супакойвацца, але акрамя трэску, яшчэ пералятаў з месца на месца па некалькі метраў туды-сюды. У рэшце рэшт падляцеў да адной с таполяў на краю дарогі і недзе там знік. А я, спачатку здзіўлены, успомніў, што не так даўно бачыў аналагічныя паводзіны і зразумеў - птушка правярала новую для сябе зімовую тэрыторыю на занятасць яе іншым крапіўнікам і ўсяляк правакавала патэнцыйнага гаспадара прагнаць сябе. Але аказалася, што месца яшчэ не занятае і таму, хутчэй за ўсё, крапіўнік перасяліўся туды каб зімаваць.

А яшчэ праз пяць дзён вада ў Нёмане паднялася амаль як бывае толькі вясной і большасць расліннасці па берагах, у якой зімавалі крапіўнікі, заліло. Так што гэты 'мой' аказаўся добрым прадказальнікам зменаў.

Гродна, 14-12-2023

Аўтар - Дзьмітры Вінчэўскі