Вушатыя совы: Умяшальніцтва не спатрэбілася

Дакументацыйныя здымкі

Сябар-арнітолаг патэлефанаваў у нядзелю і расказаў пра магчымую праблему. У дэндрапарку аграрнага ўніверсітэту існуе грачыная калонія. І ў адным з грачыных гнёздаў там штогод выводзяць патомства вушатыя совы (Asio otus). 

Сёлета там вывяліся чацьвёра савянятаў, якія сталі даволі папулярнымі ў вузкім коле мясцовых жыхароў, якія гуляюць у парку і фатографаў - гэтыя прыязжалі здымаць птушанят з Брэста і Мінска. У рэшце-рэшт савяняты падраслі і старэйшыя з іх амаль цалкам аперыліся. Але перабраліся на высокую плакучую вярбу і праблема магла быць у тым, што адна з тоўстых галін, як гэта часта бывае ў старых вербаў, абламалася ў ствала і ў бліжэйшыя дні яе з дапамогай аўтавышкі маглі адпілаваць. І хаця пушаняты сядзелі на суседняй, невядома як бы яны адрэагавалі на падобную падзею.

На жаль, у нядзелю мы нічога не змаглі даведацца і вырашыць, а ў панядзелак аказалася, што уся чацвёрка перабралася на нейкае іншае дрэва і ім, нават тэарэтычна, ужо нічога на той вярбе не пагражае.

А самым нечаканым стала ў панядзелак прызнанне аднаго з кіраўнікоў аграрнага ўніверсітэту, што яны нічога пра соваў у іх дэндрапарку не ведаюць) 

Гродна, 16-06-2024

Аўтар - Дзьмітры Вінчэўскі