Шпакі: Таму што мы пара

Звычайна падобныя паводзіны ў шпакоў (Sturnus vulgaris) пачынаюцца значна пазней і таму я прыпыніўся паглядзець чым і як хутка яны скончацца. А выглядаюць яны так: самка ходзіць ці перабягае па зямлі наперадзе, а за ёй ходзіць ці таксама перабягае самец. Але самец не проста ходзіць, а часта прыпыняецца і спявае і ў гэтыя некалькі секунд выглядае нібыта ў трансе. 

І хаця здаецца, што ніякія прысады яму не патрэбныя, у гэты раз аказалася інакш і як толькі пара (у самкі нашмат больш белых рысачак-плямак, асабліва спераду і на галаве) аказалася паблізу нізкай агароджы дзіцячай пляцоўкі, самец узляцеў на адну з дошчачак і спяваў ужо адтуль:

За гэтую хвіліну самка ў пошуках ежы аддалілася на некалькі метраў і самец пасля спеваў хуценька далучыўся да яе. Здавалася, самка ўвогуле не звяртае на яго ўвагу, але як толькі ёй падалося, што ён выцягвае з зямлі чарвяка, яна ў момант апынулася побач і адпіхнула яго. На жаль, чарвяка не было і тут ужо самец пабег наперадзе, падымаючы мінулагодняе дубовае лісце, а самка йшла паблізу за ім.

Гродна, 12-03-2026

Аўтар - Дзьмітры Вінчэўскі