Пчала-цясляр у горадзе

Дакументацыйныя здымкі

Не магу сказаць, што я люблю падобныя сытуацыі, калі патрэбны выбар паміж двума цікавымі істотамі як аб'ектамі здымак. Пра першы аб'ект будзе асобная фота-гісторыя, а другі - вось, на здымках тут.

Гэта пчала-цясляр (Xylocopa valga), якая для мяне выдатны прыклад прыроднага дызайну. Усё ў ёй вытрымана ў самым сучасным падыходзе як формы цела і галавы, якімі яна найбольш нагадвае вялікіх водных жукоў з іх абцякаемасцю, так і крылаў сіняга колеру - як раз у колер цела. Ну і памеры сур'ёзныя - знікаюць сумневы, што такое насякомае можа самастойна і пастаяць за сябе, і выгрызьці у старай драўніне адпаведна доўгі ход для размяшчэння ў ім яек і ежы для будучага патомства.

Менавіта старая драўніна з разабранага дому і агарожа будаўнічай пляцоўкі драўлянымі слупамі і прыцягнула ў месца, дзе я чакаў цікавую птушку, гэтую пчалу. Зняць яе атрымалася далёка не с першага разу. Але пчала раз за разам праз прамежкі ў некалькі хвілін вярталася то да драўляных балак, то да слупа агарожы і таму атрымалася задакументаваць яе знаходку.

Гэта ўжо трэцяе месца, дзе я бачыў гэты паўднёвы від, занесены ў чырвоную кнігу Беларусі ў нашым горадзе, а ў адным з іх сустракаў гэтых пчолаў нават неаднойчы.

Гродна, 31-05-2026

Аўтар - Дзьмітры Вінчэўскі