Пасля таго, як неабыякавыя людзі пад час краўдфандынгавай кампаніі даслалі ў два разы больш грошай на выратаванне ў Беларусі сіпухі (Tyto alba), чым разлічвалі яе арганізатары з АПБ, шанец займець сваю гнездавую скрыню атрымалі не толькі совы з заходняй часткі Берасцейшчыны (дзе гэта адразу планавалася), але і з захаду Гарадзеншчыны.
Пасля даследавання фермаў і вёсак у Бераствіцкім раёне ўздоўж мяжы з Польшчай (далёка ад яе сіпухі ў Беларусі не адзначаліся на гнездаванні), мы выбралі некалькі добрых - на наш погляд - месцаў куды можна было б павесіць сіпушаткнікі. І вось 7 штучных гнёздаў зробленыя і сёння мы павесілі у будынку б. млына ў в.Муравана і ў старой ферме ў в.Лішкі першыя дзве з іх.
Наперадзе ў бліжэйшыя дні - яшчэ 5 гнездавых скрыняў і маніторынг за імі. Спадзяемся, што совы ацэняць нашу працу!
Вялізарны дзякуй Яўгену Вінчэўскаму, Юрыю Лукашэнцы, Вітаўту Парфёненку, Вользе Янчурэвіч і мясцовым жыхарам за актыўную дапамогу!
06-12-2019, Гарадзеншчына
Аўтар - Дзьмітры Вінчэўскі
- Увайдзіце ці зарэгіструйцеся каб пакідаць каментары.
Каментары
pva - 07.12.2019 - 21:25
Заселяцца яны, ці не!?…
Заселяцца яны, ці не!? Будзем спадзявацца. Цікава будзе даведацца? А справа зроблена добрая...
Harrier - 07.12.2019 - 23:53
In reply to Заселяцца яны, ці не!?… by pva
Дзякуй за добрыя словы!…
Дзякуй за добрыя словы! Прадказаць немагчыма - зараз проста большая імавернасць, што зіогуць знайсці сабе жытло побач з фермамі, дзе могуць паляваць.
Vanellus - 08.12.2019 - 00:27
Домікі зробленыя з мэблявых…
Домікі зробленыя з мэблявых шчытоў. Гэты матэрыял вельмі гладкі. Як птушаняты будуць выбірацца, калі прыйдзе час? Кіпцюрамі за такую паверхню не зачапіцца.
Harrier - 08.12.2019 - 11:04
In reply to Домікі зробленыя з мэблявых… by Vanellus
Адлегласць ад дна скрыні да…
Адлегласць ад дна скрыні да лятка зусім невялікая - будуць выпрыгваць.