Вялікія бакланы і маразы

Хаця і непрацяглыя, але моцныя маразы не прайшлі без сляда нават для Нёмана.

Спачатку з'явіўся і пачаў ноч ад ночы расці ўшыркі лёд уздоўж берагоў, і, асабліва, у затоках. А потым над летняй мялізнай па цэнтру ракі і ў цэнтры гораду з'явіўся ледзяны востраў.

Новай бяспечнай прысадай для адпачыгку і прывядзення сябе "у парадак" пачалі ахвотна карыстацца пад 100-150 вялікіх чаек (усе, або амаль усе - клыгуны). Ну і вялікія бакланы (Phalacrocorax carbo), якія звычайна не вельмі любяць адпачываць у горадзе і звычайна пралятаюць яго ад плаціны ГЭС, якая знаходзіцца вышэй па плыні км 10 ад гораду і ўніз, калі ляцяць у бок Літвы "на рыбалку". 

Мароз не дазваляе проста чакаць, калі пер'е падсохне - бо вада можа і замёрзнуць пад час прасушкі. крылаў.

Таму некаторыя з бакланаў для пэўнасці дадаюць актыўную вентыляцыю:

https://youtu.be/jH1LLIh5L4M

Тыя, што пад'елі і прасохлі, спакойна спяць, схаваўшы голаву і шыю такім чынам, што здалёк вельмі падобныя на пінгвінаў - так траціцца найменш патрэбнай яшчэ і для доўгай і марознай ночы энергіі. 

Хутчэй за ўсё з адлігай паводзіны бакланаў зменяцца, і яны зноў будуць толькі пралятаць над горадам. А зараз ёсць магчымасць назіраць за імі параўнальна зблізку.

19-01-2021, Гродна

Аўтар - Дзьмітры Вінчэўскі

__________________________-

Пры выкарыстанні здымкаў у сацсетках забаронена размяшчаць больш аднаго здымка з фотасерыі на пост, таксама абавязковы надпіс "больш здымкаў і відэа тут:" і далей канкрэтны адрас на знаходжанне фота-серыі на сайце.