Шэрая леска: Самец на адзін вечар

Увечары я вяртаўся дахаты ўздоўж берага ракі, калі збоку ад мяне зрабіў высокую 'свечку'  метраў у 10 вышынёй самец шэрай лескі (Sylvia communis) і прызямліўся на адзін з трох ці чатырох конскіх шчаўёў. Такога высокага токавага палёту ў гэтага віду я яшчэ не бачыў і зразумела, што ён прыцягнуў маю ўвагу.

Тут, на засыпаным большымі і меншымі камянямі беразе ракі пасля некалькіх дажджоў запар і наступнага цяпла хутка паднялася розная травяністая расліннасць, засталася і невялікая колькасць сухіх мінулагодніх сцяблін. Але па вышыні дамінавала менавіта конскае шчаўё. Таму ў асноўным паміж імі і пералятаў і час ад часу спяваў самец. Яшчэ ён даследаваў густую травяністую расліннасць навокал і прападаў у ёй на хвіліну ці дзве.

Раней самца лескі тут не было - магчыма, што ён вырашыў шукаць - і знайшоў - новы гнездавы ўчастак пасля таго, як не вельмі далёка адсюль уся высокай расліннасць была скошаная трымерамі, а сярод яе яшчэ нядаўна спяваў не адзін самец шэрай лескі.

Я ўжо ўзрадаваўся, што у гэтым месцы будзе добра здымаць самца і развіццё падзей, але назаўтра птушка там знікла і больш я яе ні там, ні нідзе побач не бачыў. Што з ёй здарылася, не ведаю. Магчыма, злавіў шуляк-карагольчык, а можа і коцік.

28-05-2022, бераг Нёмана ў Гродна

Аўтар - Дзьмітры Вінчэўскі