Вялікія белыя чаплі - універсальныя рыбакі

Вялікія белыя чаплі (Egretta alba) палююць, канешне, не толькі на водных жыхароў - часам іх можна ў параўнальна вялікай колькасці сустрэць і на палях, дзе іх здабычай становяцца грызуны. Але менавіта  рыбы, ці хутчэй, рыбкі, - асноўная ежа. Памеры асноўнай здабычы добра бачныя на здымках і відэа ніжэй.

На Нёмане яўна ёсць менш і больш любімыя месцы, на якіх птушак сустрэнеш часцей за ўсё і напэўна там яны бываюць найбольш паспяховымі.

За апошнія два месяцы  прыйшлося назіраць шмат паляванняў (ці ўсё ж рыбалак?) белых чапляў і можна  вылучыць асноўныя тактыкі. Самы рэдкі метад і найменш паспяховы, гэта  пагоня за рыбай на адкрытым неглыбокім месцы:

Дарэчы, гэты спосаб вельмі нагадвае тое, як палюе шэрая чапля, толькі апошняя хутчэй чакае на здабычу большых памераў і часта паспяховая ў сваім чаканні.

Другі спосаб вельмі часты і вельмі паспяховы, гэта паляванне на дробную здабычу сярод расліннасці з вады. Гэта дазваляе чаплі падабрацца да рыбак максімальна блізка, заставаючыся нябачнай і дакладна разлічыць патрэбную адлегласць і глыбіню для поспеху атакі.  Аднойчы прыкладна за 3 хвіліны чапля  злавіла так 10 рыбак з 11 спробаў, і хаця ўсе яны былі вельмі малога памеру, іх колькасць яўна ў рэшце рэшт кампенсавала недахоп масы)

Трэці спосаб не менш паспяховы і больш універсальны, але выкарыстоўваўся не так часта, як другі: гэта паляванне на адкрытай вадзе  з вады - чапля спецыяльна спускалася  у ваду з берагу і даволі хутка лавіла рыбак без асаблівай праблемы. Варыянт гэтай лоўлі - паляванне з берагу: чапля не заходзіць у ваду, а максімальна нахіляецца да яе і выхоплівае рыбак і на адкрытай прасторы, і з прыбярэжнай расліннасці.

Ну і самы цікавы, і напэўна даволі паспяховы метад рыбалкі, які можа выкарыстоўвацца калі іншыя  не даюць жаданага выніку - паляванне з выпалохваннем ахвяр. Яго сутнасць вельмі простая: чапля на рознай глыбіні ў вадзе пачынае даволі хутка пераступаць нагамі амаль на адным месцы ў своеасаблівым танцы з простымі рухамі. Гэта павінна тэарэтычна выганяць бліжэй да паверхні тых, хто схаваўся ад яе ці ўвогуле вядзе скрытны лад жыцця, але ні разу паспяховай атакі пасля гэтага я не бачыў. Хаця  яны мусяць быць, бо інакш птушкі не выкарыстоўвалі б гэты метад  зусім.

Верасень і кастрычнік 2021,  берагі Нёмана ў Гродна

Аўтар - Дзьмітры Вінчэўскі