Першыя арэхі

Дакументацыйныя здымкі

Штогод я чакаю пачатку 'арэхавага сезону' - калі гракі (Corvus frugilegus) і шэрыя вароны (C. corone cornix), а часам нават каўкі (C. monedula) пачнуць выкарыстоўвываць багаты харчовы рэсурс - грэцкія арэхі. Часам атрымліваецца ўбачыць і зняць розныя небанальныя гісторыі, звязаныя з тым, як гэтыя вельмі разумныя птушкі спраўляюцца з такой ежай.

Гэтай восенню першым, каго я заўважыў з грэцкім арэхам, стаў грак, які выкапваў дзюбай ямку ў зямлі, каб той арэх туды прыхаваць. Але прыкладна ў метры ад яго хадзіў туды-сюды другі грак, які яўна перашкаджаў думаць толькі пра ямку першаму. І першы адагнаў другога метры на 3-4, дакапаў ямку, паклаў у яе арэх, прысыпаў і адразу адляцеў. Другі ж адразу пабег на тое месца і ўжо праз некалькі секунд трымаў той арэх у дзюбе. А далей здарылася тое, чаго я не чакаў. Птушка даволі хутка дастала смачнае змесціва з абодвух палавінак арэха, але не праглынула, а змясціла ў т.зв. пад'язычны мяшок, які стаў заўважна вылучацца. Адыйшла метры на 3 убок і там прыхавала, прычым таксама ў папярэдне выкапанай ямцы.

Другой сустрэтай птушкай з арэхам стала шэрая варона. Яшчэ здалёк я ўбачыў, як яна спачатку скінула 'здабычу' на дарогу, а потым прынялася яе дзяўбсці там жа дзюбай. Перашкодзіла ёй у гэтым машына, якая хутка набліжалася. Птушка вырашыла не рызыкаваць і пераляцела праз дарогу з арэхам у дзюбе, дзе працягнула спрабаваць яго адкрыць ударамі дзюбы. Але даволі хутка спынілася, адвярнулася да арэха хвастом і ... адляцела. Я падумаў, што напэўна арэх аказаўся замоцны, не паддаўся і гэта стала прычынай таго, што варона вырашыла заставіць яго ў спакоі. Але калі я падыйшоў паглядзець на яго, гэта аказалася толькі паловай праўды. Акрамя моцнага шкарлупіння, праз невялікую дзірку ў ім было бачна, што арэх згніў унутры і таму працягваць спробы адкрыць яго не мела сэнсу.

Гродна, 13-09-2025

Аўтар - Дзьмітры Вінчэўскі