Апошняя ноч на гняздзе

14 жніўня стаў сведкам не зусім звычайных падзей, якія адбыліся з гняздом белых буслоў у Пінскім раёне. Ужо ў сярэдзіне ліпеня маладыя птушкі (якіх старанныя дарослыя буслы змаглі выгадаваць ажно 5) пачалі спрабаваць крыло, і неўзабаве да канца месяца пакінулі свой "дом". Як звычайна пасля гэтага на гняздо толькі прыляталі начаваць бацькі. Так працягвалася амаль два тыдні.
Але аднойчы ўвечары, ўжо ў прыцемках да гнязда завіталі не толькі два дарослыя буслы, але і яшчэ каля 20 іншых! Яны расселіся побач з гняздом - на вялізнай ёлке, слупах і дахах дамоў.

Было падобна на тое, што яны вырашылі тут начаваць, але таксама здавалася, быццам яны нечага чакаюць. І неўзабаве нейкае прадстаўленне на самой справе пачалося. Не ведаю дакладна на сто адсоткаў, якія птушкі ўдзельнічалі ў ім, таму што было цёмна, але прынамсі мне падаецца больш імавернай такая версія: 
На гняздо да дарослых буслоў падляцела маладая птушка (напэўна іх дзіця) і пачала іх праганяць, пры гэтым моцна цокая дзюбай.

Спачатку адну птушку...

Потым другую...

Дарослыя адляцелі зусім недалёка, нібы разважаючы.

Хутка адзін з бацькоў вярнуўся да гнязда. На гэты раз ён сышоўся з той птушкай ў нейкім рытуальным танцы?, з мноствам шыпення, цоканнем дзюбамі, узмазамі крылаў і закідамі галоў. Гэта доўжылася некалькі хвілін.






Пасля гэтага яны разам зляцелі і яшчэ зладзілі міні-сутычку ў паветры. На гэтым, можна сказаць, усё і скончылася - пачаўся моцны дождж. Ні заўтра, ні паслязаўтра буслоў ужо не было... і не будзе да наступнай вясны))