Мобінг арлана ў цэнтры гораду

Дакументацыйныя здымкі

Так часам бывае, што паспя першай сустрэчы з цікавым відам параўнальна хутка адбываецца другая. Так здарылася і ў гэтым выпадку з арланам-белахвостам (Haliaetus albicilla) у цэнтры гораду.

Прайшло толькі тры дні пасля сустрэчы маладога арлана, які паспяхова паляваў на Нёмане, і вось, зусім нечаканая, іншая, дарослая птушка! 

Я вяртаўся дахаты праз скверык на тым беразе, калі раптам пачуў дзіўны, трошкі жаласлівы і адчайны крык 'з неба'. Шукаць крыніцу крыку доўга не прыйшлося і хутка я ўжо назіраў і здымаў пагоню шэрых варон (Corvus corone cornix) за арланам-белахвостам. Вялікая птушка старалася хутка набраць вышыню і так адарвацца ад некалькіх варон, якія яўна не хацелі здавацца і як маглі, то трымаліся паблізу. Ужо ў хаце на маніторы кампутара я заўважыў побач з гэтымі відамі яшчэ і шуляка-каргольчыка (Accipiter nisus) (ён абведзены белым на адным са здымкаў, але ёсць і на іншым), але яго ролю ў мобінгу арлана я не зразумеў - магчыма шуляк проста апынуўся побач. 

І вось на працягу прыкладна двух хвілін арлан стараецца падняцца ўсё вышэй і вышэй і адарвацца ад непажаданага 'эскорта'. І ў рэшце-рэшт гэта ў яго атрымліваецца - апошняя варона, якая старалася не 'адпусціць' яго, таксама адстае і застаецца знізу. Але арлан яшчэ доўга не губляе вышыню і падымаецца ўсё вышэй і вышэй, пакуль я не трачу яго.

Нёман у Гродна, 06-11-2024

Аўтар - Дзьмітры Вінчэўскі