Моцны снегапад і ўдача зімародка

Дакументацыйныя здымкі

У гэты дзень яшчэ з ночы паваліў снег. Но было цёпла і лёд яшчэ не пачаў напаўзаць на раку ад яе берагоў. Ратавальнікі на пляжы ўжо некалькі дзён як не толькі разабралі свой памост з аднолькавых пластыкавых частак-пантонаў, але і выцягнулі на бераг ды перавярнулі ўверх пузам адзіную, не схаваную на зіму, сваю лодку. Засталіся толькі агароджаныя па пярыметру тоўстай вяроўкай на вышыні каля паса чалавека дзве секцыі былога памоста, якія чырвоным квадратам ўдаваліся ў раку прыкладна на метр.

Калі мы падыйшлі да пляжа, то праз густы снег ўбачылі на гэтай тоўстай вяроўцы з боку ракі зімародка (Alcedo atthis)! Прайшло некалькі секунд і птушка пераляцела і села на вяроўку бліжэй да берагу. А адтуль пад вострым вуглом нырнула і вынырнула з зусім маленькай рыбкай, памерам меншай за сваю дзюбу.

Птушка не стала больш сядзець на адкрытым з усіх бакоў папярэднім месцы і паляцела ў купіну трыснягу, якая засталася метрах у 15-20 ад месца паспяховай рыбалкі і села там з боку ракі так, што яе перастала быць бачна.

Але мы і так былі рады і нечаканай сустрэчы з самага ранку і таму, што хаця і невялічкай рыбкай, але зімародак паснедае.

Нёман у Гродна, пачатак снежня 2022 г.

Аўтар – Дзьмітры Вінчэўскі

Здымкі зроблены ў іншым месцы і да гэтай гісторыі