Ёсць пэўныя навуковыя тэрміны, якія памятаеш і нават ведаеш, што яны азначаюць, аднак праяўлення якіх не бачыш у жыцці. Аднак толькі да пэўнага дня. Так здарылася і са словазлучэннем `pecking order` ('хто каго дзяўбе'), якое ўпершыню было апісана і ў ўведзена ва ўжытак больш 100 гадоў таму на прыкладзе ўзаемаадносін свойскіх куранят у групе, а аказалася ўніверсальным для любых сацыяльных груп жывёл уключна з нашым відам - праўда, у адрозненне ад птушак, з пераносным значэннем.
Хаця два палявых вераб'я (Passer montanus), якія сядзелі ў пясочных ямках не вельмі далёка ад ходніка былі амаль незаўважныя, але іх выдалі рухі, якімі яны час ад часу змянялі сваё палажэнне ў гэтых ямках. Увогуле, вераб'і абодвух відаў - адны з нешматлікіх нашых птушак, якія любяць рэгулярна прымаць пясочныя ванны Прычына зразумелая - хутчэй за ўсё гэта дае ім магчымасць пазбывацца з дапамогай прасеву пясчынак праз пер'е ад эктапаразітаў. Аднак у гэтым выпадку птушкі фактычна не ўздымалі крыльямі пясочныя патокі і проста знаходзіліся ў ямках. Магчыма, там было проста трошкі халадней за паверхню, тым больш ямкі былі параўнальна глыбокія.
І тут здарылася нечаканае: малады верабей выскачыў са сваёй ямкі і ўдарамі дзюбы выгнаў з суседняй ямкі дарослага:
Для чаго гэта трэба было рабіць, акрамя як паказаць сваё дамінаванне, не зразумела, бо ямкі былі вельмі падобныя і нават калі яму хацелася пасядзець менавіта ў суседняй, карыстаўся ён гэтай магчымасці толькі секунды. Якім чынам маладая птушка аказалася дамінантам над яўна старэйшай, мне не зразумела. Магчыма дамінант - будучы самец, а субдамінант - самка?
Гродна, 19-07-2025
Аўтар - Дзьмітры Вінчэўскі
- Увайдзіце ці зарэгіструйцеся каб пакідаць каментары.
КАМЕНТАРЫ