Шэрая варона: - Не любіце чэрствы хлеб? Вы проста не ўмееце яго размачваць.

Дакументацыйныя здымкі і відэа

Даўно ведаў і нават не раз назіраў, як шэрыя вароны (Corvus corone cornix) размачваюць чэрствы хлеб перш, чым яго праглынуць. Але зблізку паназіраць за гэтым і зняць атрымліваецца нячаста, нават не штогод.

Сустрэча адбылася на заасфальтаванай сцежцы паміж бальніцай і мікрараёнам параўнальна старых дамоў, дзе пасля дажджоў заўсёды стаіць вада ў паніжэнні асфальту - яго там проста 'недаклалі'. Менавіта туды і прыляцела з лустай белага батону варона. Хлеб аказаўся не надта чэрствы, бо птушка даволі хутка перавярнула яго і стала праглынаць з намочанага боку, лёгка адрываючы мяккія, мокрыя кавалачкі:

Спяшацца ёй не было куды, але даволі хутка ўсё ядомае было акуратна падабранае з вады і знікла ўнутры вароны, пасля чаго яна адляцела ў бок бальніцы. Хутчэй за ўсё там і была падабраная луста хлеба, якога не шкадуюць хворым.

Гродна, 02-11-2024

Аўтар - Дзьмітры Вінчэўскі

На гэтую ж тэму:

Шэрыя вароны: размачваем, а потым праглынаем

Шэрыя вароны: размачваць можна не толькі хлеб!