Малы індыйскі дроп = Lesser Florican

Дакументацыйны здымак

Успамін пра Індыю і яе птушак.

Lesser Florican  (Sypheotoides indica), female. 02.12.2010. Velavadar National park, Gujarat, India.

Photo made by Dzmitry Vincheuski.

Некаторыя сустрэчы з новымі відамі ўражваюць, але паступова ўспаміны пра іх блякнуць. Некаторыя ж застаюцца моцнымі праз доўгі час. Напэўна, гэта зьвязана яшчэ і з абставінамі, ў якіх яны адбыліся. Адной з такіх запамінальных сустрэч была наша з братам выпадковая сустрэча з малым індыйскім дропам, або малым флоріканам = Lesser Florican (Sypheotoides indica).

Гэта эндэмік Індастану, па апошніх аценках (2010) уся папуляцыя налічвае прыкладна толькі 1500 птушак.

Раніцай 2 снежня 2010 г., яшчэ ў прыцемках, мы паехалі на месца, адкуль учора ўвечары назіралі грандыёзны прыродны спектакль - збор на начлег больш за тысячу лунёў трох відаў: у асноўным, поплаўнага, у меншай колькасьці стэпавага і некалькіх птушак балотнага. Ўсё гэта адбывалася прыкладна на 1 кв км сухой саванны і ўздоўж гэтага кавалка на палявой дарозе. І вось, каб убачыць ранішні разьлёт гэтых птушак, мы і ехалі на тое ж месца з самага ранку.

Нечакана ў сьвятле фар каля дарогі паказалася невысокая і смуклая, але вельмі прыгожая птушка - малы флорікан! Я пасьпеў зрабіць толькі два здымкі. Адзін з іх аказаўся нярэзкі, другі, выраўняны і абрэзаны, вы бачыце перад сабой...  

Аўтар - Дзьмітры Вінчэўскі