Навукоўцы знайшлі метад атрымаць ДНК са шкарлупіння яек вымерлых відаў птушак

    Міжнародная каманда даследчыкаў паспяхова ізалявала ДНК са шкарлупіння яек некалькіх відаў птушак, у тым ліку эпіорніса, або сланоўей птушкі, якая знікла стагоддзі таму. Часопіс The Proceedings of the Royal Society B паведамляе, што метад выдатна спрацаваў на эму, некалькіх відах качак і вымерлых моа.
Новыя магчымасці цяпер адкрываюцца для палеантолагаў і эвалюцыйных біёлагаў – шмат для якіх груп птушак можна будзе прасачыць нюансы іх эвалюцыі нават пасля таго, як яны зніклі сотні ці тысячы год таму назад.

    "Дагэтуль многія даследчыкі беспаспяхова спрабавалі ізаляваць ДНК з выкапнёвых кавалкаў шкарлупіння” – сказала Шарлота Оскам (Charlotte Oskam) з універсітэту Murdoch , штат Заходняя Аўстралія. "Аднак яны выкарыстоўвалі метады, якія пасуюць для касцяных парэшткаў, але не для шкарлупіння”.
Пакуль што найбольшы поспех міжнароднай каманды навукоўцаў – атрыманае ДНК эпіорніса (Aepyornis) , нелятаючай птушкі, якая важыла каля 500 кг і, магчыма, была самай цяжкай птушкай у гісторыі нашай планеты. Эпіорніс выглядаў як вялізарны страус – яго вышыня дасягала трох метраў. Большасць эпіорнісаў знікла яшчэ тысячу гадоў таму.
Археолаг Майк Паркер Пірсан (Mike Parker Pearson) з універсітэту Шэффілд спадзяецца на тое, што цяпер можна будзе больш даведацца пра прычыны знікнення гэтых птушак. Пакуль што яго звычайна звязваюць са знішчэннем людзьмі натуральных месцапражыванняў гіганцкіх птушак. Аднак загадка ў тым, што пакуль няма сведчанняў таго, што людзі палявалі на эпіорнісаў. "Няма нават доказаў, што старажытныя насельнікі Мадагаскару спажывалі яйкі эпіорнісаў, хаця з аднаго можна было прыгатаваць амлет на 30 чалавек” – кажа Пірсан.
У мінулым годзе на адным з лонданскіх аўкцыёнаў яйка эпіорнісаў, адкладзенае яшчэ ў XVII стагоддзі, было прададзенае за £5000.
    Першапачаткова яно ўтрымлівала нават зародак, але пасля таго, як упала і разбілася, пазней было ўзноўлена з кавалкаў шкарлупіння ўжо без яго. Апошні эпіорніс знік ужо ў гістарычны час, прыкладна ў сярэдзіне 1650-х гадоў.

Паводле www.news.bbc.co.uk (тэкст і фота) падрыхтаваў Дзьмітры Вінчэўскі для www.birdwatch.by
 

На гэтую тэму:
Аўстралійскую мегафауну знішчылі першабытныя людзі

Вызначаныя ўсё віды моа

Колер апярэння моа можна будзе аднавіць па структуры іх ДНК

Зніклі назаўжды? Сумны спіс апошняга дзесяцігоддзя.

Трапічныя птушкі чакалі на сухапутны “мост”