КАМЕНТАРЫ

Больш каментароў →

CLUB200

АПОШНІЯ ФОТАЗДЫМКІ

У Віцебску ўсталявалі помнік князю Альгерду з драпежнай птушкай на руцэ

 24 чэрвеня на Рынкавай плошчы насупраць Уваскрасенскай царквы быў усталяваны помнік князю Віцебскаму (1320 – 1345 гады), Вялікаму князю Літоўскаму (1345 – 1377 гады) Альгерду. Цікава, што з рукі князя злятае драпежная птушка, якую скульптар лічыць выявай сокала.

Конны помнік князю створаны мінскім скульптарам Сяргеем Бандарэнкам і адліты на полацкім прадпрыемстве «Тэхналіт». 

Урачыстае адкрыццё помніка адбудзецца 27 чэрвеня ў 15:00 падчас святкавання 1040-годдзя Віцебска. 

Пра гісторыю стварэння і сімволіку вобразу расказвае скульптар Сяргей Бандарэнка.

«Наша Ніва»: Гісторыя з гэтым помнікам доўгая. Яшчэ год таму з’яўлялася інфармацыя, што ў Віцебску будзе ўсталяваны помнік Альгерду аўтарства скульптара Валерыя Магучага. Пасля той праект завярнулі. Вы, наколькі разумею, дапрацоўвалі помнік, першы варыянт якога не быў зацверджаны?

Сяргей Бандарэнка: Не, я рабіў помнік ад пачатку, па ўласным эскізе. Хоць такога ўжо прынцыповага там няма адрознення ад першага варыянта.

«НН»: Калі параўнаць «ранейшага» і «цяперашняга» Альгерда, ваш выглядае больш дынамічным: конь у руху, жэст рукі наперад… СБ: Так, конь ідзе алюрам, гэта такая даданая рысь.

«НН»: На чым вы грунтаваліся, ствараючы вобраз?

СБ: На жаль, іканаграфічнага матэрыялу тых часоў няма. Ёсць гравюры XVII стагоддзя.

«НН»: Маеце на ўвазе Гваньіні?

СБ: Так. Там Альгерд — у італьянскіх даспехах XVI стагоддзя. Я адштурхоўваўся ад Гваньіні, але ў канчатковым выніку грунтаваўся на сваіх уяўленнях пра тое, якім князь мог бы быць. І лічу, што ўрэшце вобраз склаўся.

«НН»: А чаму абралі такі сюжэт — паляванне з сокалам?

СБ: Якое ж гэта паляванне? Хто ездзіць паляваць у баявых даспехах? Тут іншая сімволіка: сокал — знак княжай улады. Дынаміка жэста адлюстроўвае такі дзяржаўніцкі пасыл. З жэстам, дарэчы, былі праблемы: спачатку ён быў крыху іншы, але камусьці не спадабалася, пабачылі асацыяцыі якіясьці… Таму я жэст змякчыў, руку падвярнуў трохі. І ўвогуле, так мала было часу — я зрабіў бы помнік нашмат лепшы.

....

Паводле Народныя навіны Віцебска (інфармацыя і фота) і Наша ніва (частка інтэрв’ю) падрыхтаваў Дзьмітры Вінчэўскі  

 

На гэтую тэму: На Гарадзеншчыне з’явіўся помнік сокалу-падарожніку

 

Comments

Проніч - 26.06.2014 - 17:47

Ясны сокал - прыкмета мудрага Вялікакняжацкага ўладарства. Разам з воярскімі здольнасьцямі Альгерда мудрасьць кавала Залаты век ВКЛ. Скульптура занадта спакойная для Альгерда, скажам, занадта зямная. Яе б прыпадняць на 2 м - усё зьмянілася б. Сутнасьць, аднак, можа быць рознай: Альгерд пасярод нас і з намі, ці Альгерд пасярод нас і над намі.

Ці варта апускаць Вялікага князя на ўзровень агульнай шэрасьці?..

AV - 26.06.2014 - 22:41

 «НН»: А чаму абралі такі сюжэт — паляванне з сокалам?

СБ: Якое ж гэта паляванне? Хто ездзіць паляваць у баявых даспехах? Тут іншая сімволіка: сокал — знак княжай улады. Дынаміка жэста адлюстроўвае такі дзяржаўніцкі пасыл. З жэстам, дарэчы, былі праблемы: спачатку ён быў крыху іншы, але камусьці не спадабалася, пабачылі асацыяцыі якіясьці… Таму я жэст змякчыў, руку падвярнуў трохі. І ўвогуле, так мала было часу — я зрабіў бы помнік нашмат лепшы.

 вельмі цікавае інтэрв'ю

Чытаць цалкамhttp://nn.by/?c=ar&i=130420

Уладзя (госць) - 02.07.2014 - 00:13

Адносна Сяргея Бандарэнкі: здольны натуральны чалавек, добрая праца – прафесійная. Калі з часам падыме скульптуру, каб не краналіся рукой ног каня – твор загучыць зусім інакш, а кампазіцыю можна будзе лічыць удала завершанай.