Смерць птушак праз дэфіцыт вітаміну B1

07.01.2010 - 00:16 | Kiolk

     Недахоп вітаміну В1 (тыаміну), які неабходны для функцыянавання нярвовай сістэмы, можа з’яўляцца адной з частых прычын смерці птушак. Ужо даўно было высветлена, што птушкі паміраюць ў Балтыйскім рэгіёне ў павышанай колькасці ад паралюшу. На поўдні Швецыі ў 451 з 837 паміраючых птушак вызначыліся сімптомы, якія ўяўляюць сабой некалькі этапаў.

      Спачатку птушкам цяжка складаць крылы. Потым выяўляецца няздольнасць да палёту і адсутнасць апетыту; і, нарэшце, птушкам цяжка дыхаць, яны не могуць стаяць на нагах.. Хутка надыходзіць смерць. 
Аналіз смяротнасці птушак ад паралюшу паказаў значны недахоп вітаміну В1 у іх арганізме. З некалькіх відаў птушак, якія даследаваліся, найбольш увагі надалі чайцы-клыгуну (на здымку - маладая асобіна), шпакам і звычайным гагам, якія моцна адрозніваюцца па рацыёне харчавання, месцах пражывання, шляхах міграцый і паводзінах. Хворыя птушкі, якім даследчыкі ўводзілі тыамін, папраўляліся амаль усе. А вось птушкі з кантрольнай групы, якія атрымлівалі лекі для лячэння паралюша, наадварот, не паказалі ніякага паляпшэння. Сімптомы паралюша ў птушак упершыню адзначылі яшчэ ў 1982 годзе, так што праблема, відавочна,існавала незаўважна на працягу амаль 30 гадоў. 
Цяпер біяхімічная прычына хваробы зразумелая, аднак контрмеры не будуць прынятыя пакуль прычына дэфіцыту тыаміна не будзе высветлена. 
Застаецца яшчэ адно пытанне: магчыма, таксама і іншыя жывёлы пакутуюць ад гэтага, акрамя птушак?
Паводле www.vogelwelt.com пераклала Юля Патоцкая 
Фота з club.foto.ru 

Comments