Памылка

Дакументацыйныя здымкі

Пра гнездаванне пары звычайных рудахвостак (Ph. phoenicurus) недзе на схіле ў даліне Гараднічанкі  недалёка ад мосціка праз гэтую рэчку я ведаў параўнальна даўно. Бо калі зрэдку пераходзіў на іншы бок, то часам чуў выразныя спевы самца сярод дрэваў на тым беразе, а апошнія разы і часты, настойлівы свіст - папярэджанне рудахвостак пра нейкую небяспеку побач з імі.

У гэты ж раз за мосцікам я спачатку ўбачыў не рудахвостак, а самца лескі-чарнагалоўкі (Sylvia atricapilla), які сядзеў спачатку на высокай вярбе, а потым пераляцеў на сухія галіны і сеў значна ніжэй. І як аказалася, ён прыцягнуў не толькі маю ўвагу - адразу пачуўся рэзкі і гучны трэск, якім птушаняты рудахвостак выпрошваюць ежу ў бацькоў і зусім нечакана і для мяне, і яўна для самца лескі-чарнагалоўкі перад ім апынулася птушанё звычайнай рудахвосткі!

Самец лескі яўна разгублена 'разглядаў' раскрытую перад ім дзюбу чужога патомка і праз некалькі секунд вырашыў лепш адляцець некуды ў бок. Птушанё ж спачатку засталося на тым самым сухім галлі, а побач ужо пачаў гучна непакоіцца (яўна на мяне) самец рудахвосткі. А праз некалькі секунд недалёка паказалася і самка. Злётак рудахвосткі яўна не быў там без сапраўдных бацькоў і чаму вырашыў паспрабаваць выпрасіць ежу ў самца лескі, засталося незарзумелым.

Самка спачатку села недалёка ад патомка, тады птушанё пераляцела бліжэй да яе і працягнула гучна трашчаць, выпрошваючы ежу. А калі самка пераляцела далей, то  паляцела за ёй і навокал стала зусім ціха)

Я яшчэ нейкі час стаяў там і са здзіўленнем успамінаў нечаканую 'памылку з бацькай' - ніколі раней я нічога падобнага не бачыў. Хаця калі б самец лескі быў з ежай у дзюбе, падобнае раптоўнае выпрошванне тэарэтычна магло б і спрацаваць.

Гродна, 18-06-2023

Аўтар - Дзьмітры Вінчэўскі