Варона і дрот: Ніколі не здавайся!

Дакументацыйныя здымкі і відэа

Усё ж вясна - вельмі ўдзячны на цікавыя назіранні час, нават у горадзе і нават больш - у яго цэнтры.

Я не бачыў самага пачатку як шэрая варона (Corvus corone cornix) знайшла доўгі кавалак дроту па схіле пад касцёлам бернардынцаў, але яна не адступала ад яго і я пачаў здымаць, зацікаўлены чым гэта скончыцца. Справа ў тым, што ўбачыць кавалак алюмініевага дроту ў сучасных гнёздах розных відаў крумкачовых не такая ўжо рэдкасць. Але ўбачыць дзе птушкі яго бяруць і як траспартуюць у гняздо, мне яшчэ не даводзілася.

Спачатку птушка вызваліла параўнальна доўгі кавалак (метра 2,5 - максімум 3) з пад пяскуці зямлі, якой ён быў часткова прысыпаны. Ну а потым пачалося яго перамяшчэнне вышэй на схіл:

Калі стала зразумела нават мне, што ў такім, амаль цалкам распраўленым выглядзе яго няма як перамяшчаць, птушка пачала з дапамогай дзюбы і ног згібаць дрот у розных месцах так, каб гэтыя сагнутыя адрэзкі мелі б прыкладна роўную даўжыню. На ўсё гэта - ад пачатку маіх назіранняў да іх канца - птушцы спатрэбілася толькі каля 3,5 хвілін. І калі я ўжо не верыў, што ў вароны можа нешта атрымацца, яна ўзяла складзены дрот пасярэдзіне і не зусім ўдала, але паляцела з ім паміж дамамі. А варон'іх гнёздаў там хапае.