У незвычайных абставінах часта можна ўбачыць нешэраговыя паводзіны. Пакуль на гэты бераг Нёману не дабраліся 'касцы' з трымерамі, ён прапаноўвываў багаты ўраджай тым, хто мог ім скарыстацца. І сярод іншых раслін там буялі Capsella bursa-pastoris, ад насення якіх гэтай расліна і атрымала сваю назву як на лаціне, так і на многіх іншых мовах. І вось спачатку сярод сцяблінаў бліжэй ходніка, а потым і на ім я заўважыў спачатку аднаго, а потым трох еўрапейскіх уюркоў (Serinus serinus), якія хутка і спраўна елі гэтае насенне!
У гэтым не было б нічога дзіўнага, каб не факт, што ўсе тры птушкі былі самцамі і елі зусім побач адна ад адной. І хаця пасля сезону гнездавання самцы, нават калі спяваюць, могуць не праяўляць агрэсіўнасць у адносінах да іншых самцоў, аднак у разгар сезону яны звычайна актыўна праганяюць адзін аднаго, часам з працяглымі пагонямі. Тут жа ўсё было мірна, без боек і пагоняў. І я падумаў, што хутчэй за ўсё галоўную 'міратворчую' ролю сыграў вялікі ўраджай капселы - яго яўна было не з'есці нават дзесяткам самцоў уюркоў і адганяць ад насення іншых не мела сэнсу. А вось дадатковыя вочы і вушы прыдаліся б каб раней заўважыць небяспеку. А яшчэ іншыя самцы змяншалі імавернасць быць злоўленым драпежнікам кожнаму з іх, што таксама было важна.
Гродна, 25-05-2026
Аўтар - Дзьмітры Вінчэўскі
- Увайдзіце ці зарэгіструйцеся каб пакідаць каментары.
КАМЕНТАРЫ