Вялікія савукі: Ці мы (не) пара?

Як гэта не дзіўна гучыць, але вялікія савукі (Mergus merganser) прыкладна з другой паловы восені вядуць сябе вельмі падобна да вясновых 'разборак', якія адбываюцца ў іх групах. А гэта такаванне самцоў з выцягнутай вертыкальна шыяй і галавой, "гыргытаннем" і кароткімі і хуткімі пагонямі адзін за адным.

Вельмі магчыма, што адным з вынікаў гэтага з'яўляюцца сфармаваныя пары. Ці застаюцца яны тымі самымі да часу размнажэння - як у іншых качак, ці  партнёры мяняюцца на працягу зімы, сказаць на непамечаных птушках немагчыма. Але адзін цікавы спосаб праверкі 'правільнасці выбара' я назіраў шмат разоў і выглядае ён наступным чынам:

Часам самка не рэагуе звычайным спосабам (не стараецца трымацца на бяспечнай адлегласці) ад чалавека і самец каля яе заўважна нярвуецца. Яму хочацца адляцець, але самка застаецца там, дзе была. І таму ён застаецца таксама. Самка як бы правярае яго - ці адляціць ён першым і 'кіне яе', ці дазволіць ёй прыняць рашэнне аб небяспечнасці сытуацыі. Звычайна самец аказваецца дастойным і бяжыць па вадзе ці адлятае толькі пасля таго, як самка палічыць, што ўжо варта гэта зрабіць і пабяжыць ці адляціць першай.

І вось калі ў мяне ўжо не было сумневаў, што бывае толькі так, я ўбачыў хутчэй за ўсё адваротную сытуацыю. То бок самка заставалася параўнальна недалёка ад мяне таму, што заставаўся самец, а не наадварот. А было гэта так:

Самец адпачываў на льду і недалёка ад яго ля берага і быў сам з качкамі-крыжанкамі. Я прайшоў побач і калі праз хвілін пяць вяртаўся, убачыў побач з ім самку! Яна яўна бачыла мяне, але самец не адлятаў і яна таксама засталася. Пачала спачатку чысціцца, а потым і плаваць недалёка ад самца. Магчыма, што яна шукала сабе партнёра, а гэты аказаўся без пары і не быў супраць?

Нёман у Гродна, 14-12-2021

Аўтар - Дзьмітры Вінчэўскі