24-07-2009: сажалкі "Азота" - вялікія белыя чаплі ды белашчокія рыбачкі

Учора ўвечары пасьля дажджу ўсёй вялікай сям'ёй з'ездзілі на Беражаны.

Перад самымі сажалкамі сустрэлі ахоўніка, які прывітаўся і паведаміў, што па перыметру сажалкі абцягваюць новым калючым дротам. Да таго ж яшчэ адна добрая навіна для птушак і бёдуотчараў: у адну з сажалак запусьцілі таўсталобікаў і амураў (?), каб тыя выядалі расьліннасьць. Таму часам заяжджае міліцыя і ганяе рыбакоў.

Птушак было параўнальна няшмат: акрамя вялікіх белых чапляў (каля 25 птушак), якія паступова ўсе расьселіся на навакольных соснах, сустрэлі 4-5 вывадкаў крыжанак (адзін з 14 вялікіх птушанят!), 2 белых бусла, 4-6 белашчокіх крычак, вывадак падрослых гогалей з 9 птушак, некалькі шэрых чапляў, чорнага бусла і вялікіх маладых кнігавак. Малады малы зуёк бегаў паміж сажалкамі, з крыкамі цякуны (5-6 птушак) таксама пераляталі з адной на адну.

Ў адным месцы на дамбе сабраліся каля 30 маладых і дарослых белых плісак.

Хмары, хаця і зьбіраліся, не пасьпелі прагнаць нас дажджом і, павячэраўшы ў палявых умовах, мы вярнуліся дахаты.

На здымках:

маладыя гогалі;

маладыя крыжанкі;

малады малы зуёк;

прыгожы вусень нейкага бражніка.