Разам, дзеля захавання Нёманскай Свіслачы!

     У мінулую суботу, 17 мая ў а.г. Свіслач (Гродзенскі р-н.) адбыўся семінар Гродзенскага абласнога аддзялення грамадскай арганізацыі “Ахова птушак Бацькаўшчыны” пад назвай “Захаваем пойму Нёманскай Свіслачы разам!”. 

     На абмеркаванне плюсаў і мінусаў стварэння ў даліне р. Свіслач новага біялагічнага заказніка сабралася амаль 20 чалавек. Сярод іх старшыня мясцовага сельсавета, прадстаўнікі ад сельскіх гаспадарак: СВК імя Крэмко, СВК Свіслач, СВК імя Дзеньшчыкова; настаўнікі Свіслацкай, Квасоўскай і Канюхоўскай сярэдніх школаў, старшыня Гродзенскага рыбалоўнага клуба, а таксама журналісты і сябры АПБ.

     У самым пачатку настаўнік гісторыі Свіслачскай сярэдняй школы Зінаіда Жукоўская распавяла пра мінулае і сучаснае а.г. Свіслач.

     Таксама удзельнікам быў прапанаваны навукова-папулярны фільм “У аб’ектыве натураліста. Гарадзенская Свіслач”. Пасля намеснік старшыні Гродзенскага абласнога аддзялення АПБ Дзьмітры Вінчэўскі распавёў пра планы і неабходнасць стварэння біялагічнага заказніка ў даліне р.Свіслач з удзелам мясцовага грамадства.

     Важным этапам семінару была праца ў малых групах з мэтай высвятлення пазітыўныя і адмоўных бакоў ад стварэння заказніка.

     Не абышлося і без вострых дэскусій з прадстаўнікамі мясцовых сельскіх гаспадарак вакол памеру прыродаахоўнай зоны і магчымых зменаў у землекарыстанні ў межах будучага заказніка.

     Пасля семінару для ўсіх удзельнікаў была арганізавана экскурсія на птушак ў ваколіцы а. г. Свіслач...

     Безумоўна, гэты семінар яшчэ не з’яўляецца заканчэннем, а толькі пачаткам вялікай працы, поспех якой залежыць ад узаемнага пагаднення і агульнай зацікаўленасці ў захаванні гэтай унікальнай тэрыторыі...

Аўтары здымкаў: Саковіч С. і Смыкоўская Т.