Чаротніца ўзімку. Частка ІІІ: разам з качкамі

Працяг. Пачатак гісторыі ТУТ і ТУТ..

Паступова выявілася і тактыка чаротніцы (Gallinula chloropus), што засталася зімаваць у невялікай купіне трыснягу ў вусці рэчкі Гараднічанкі. 

З даволі рэгулярным раскладам, прыкладна кожныя 5 хвілін, яна прыплывала з края трыснягу на бераг,  Тут недалёка ад яе таксама даволі хутка спажывалі зялёную расліннасць 2-3 пары качак-крыжанак. Мне падалося - а можа так было насамрэч, што чаротніца дзякуючы сваім значна меншым памерам і лепшаму прыстасаванню ног да надводнага жыцця і рухалася на сушы хутчэй, і адрывала сабе ежу больш спраўна:

Таксама прыкладна праз 5 хвілін адбываўся адваротны працэс: чаротніца плыла да таго самага месца з краю трыснягу і там стаяла, адпачываючы і нават часам засынаючы на некалькі секунд. Калі адпачынак заканчваўся, птушка ізноў плыла на бераг і ела зялёныя часткі раслін. Цыкл гэты паўтараўся раз за разам ажно пакуль нешта не насцярожвала ці палохала качак побач з чаротніцай. Тады яна, яўна давяраючы ім, хутка плыла ў трыснёг і там хавалася на некалькі хвілін.

Гродна, 04-02-2023

Аўтар - Дзьмітры Вінчэўскі

Працяг будзе