In Memoriam: Георгій Васільевіч Гулеўскі (1941-2017)

Георгій Васільевіч Гулеўскі

Пайшоў з жыцця калега, сябар і нефармальны настаўнік многіх з нас Георгій Васільевіч Гулеўскі, якога большасьць сяброў і знаёмых ведала як проста Жоржа… Жорж быў сапраўдным Натуралістам, які не толькі шмат ведаў і ўмеў назіраць, але і меў талент цікава паказаць і распавесці пра прыроду іншым – нават тым, хто быў далёкі ад яе…

Нарадзіўся ён 18 чэрвеня 1941 году ў Курскай вобласці.

У 15 год на першыя заробленыя грошы купіў ружжо і бінокль, бо з дзяцінства яго прыцягвала прырода.

Праз год, калі ўжо вучыўся ў ПТВ, бацькі хацелі купіць яму касцюм, але ён у краме ўбачыў першае савецкае фотаружжо і настаяў, каб купілі менавіта яго, а не вопратку. З таго часу і пачалося яго бясконцае фотапаляванне, якое змагла прыпыніць толькі смерць…

Спачатку Георгій спрабаваў сумяшчаць фотапаляванне з паляваннем, але ўрэшце-рэшт перамаглі фотаздымкі.

Пасля арміі працаваў у Краснаярскім краі, на Далёкім Усходзе ля возера Ханка, у Тульскай вобласці, пакуль, нарэшце, на запрашэнне сястры жонкі сям’я не пераехала ў 1971 г. ў Гродна. Спачатку ўладкаваўся на хлебакамбінат, але яго артыкулы пра прыроду ў “Гродзенскай праўдзе”, якія заўсёды ілюстраваў ўласнымі фотаздымкамі, прыцягнулі ўвагу кіраўнікоў мясцовага тэлебачання, куды ён і быў запрошаны ў 1972 годзе. Тры наступныя гады працаваў фотакорам, а калі там з’явілася першая відэакамера, пачаў асвойваць прафесію аператара.

Гулеўскі

Так і застаўся працаваць на Гродзенскім абласным ТБ да сыходу на пенсію - аператарам, а апошнія 2 гады і кіраўніком - вядучым прыродазнаўчай праграмы для дзетак “Леснічоўка Катафея”.

Гулеўскі

Акрамя прафэсійнай дзейнасці праз увесь час працягваў здымаць прыроду, і асабліва птушак на фота- і кінакамеру. У канцы 1970х для студыі Беларусьфільм, удзельнічая ў комплекснай экспедыцыі Інстытуту заалогіі АН па вывучэнню Палесся, зняў двух серыйны фільм “Рэдкія птушкі Палесся”. Праз 30 год яго здымкі друкаваліся ў часопісе “Прырода Беларусі”, а апошнія гады – у “Лесавіку” і “Роднай прыродзе”. Некалькі яго здымкаў упрыгожваюць і Фотагалерэю нашага сайту.

Яго нарысы пра нашу прыроду, якія Жорж заўсёды ілюстраваў уласнымі фотаздымкамі, шмат гадоў выходзілі на старонках “Гродзенскай праўды”, “Міліцэйскага весніку” і іншых рэгіянальных газет. Напэўна, не будзе вялікай памылкай сцвярджаць, што на іх вырасла не адно пакаленне гарадзенцаў.

Гулеўскі

Георгій Васільевіч удзельнічаў у афармленьні 10 кніг і фотаальбомаў, яго інфармацыя выкарыстана пры падрыхтоўцы Чырвонай кнігі Беларусі 1993 г..

Асабліва значным аказаўся яго ўнёсак у заснаванне рэспубліканскага ландшафтнага заказніка “Азёры” у 1990 годзе, бо ён выступіў ініцыятарам яго стварэння і прадставіў шмат сваіх фауністычных і батанічных рэгістрацый для абаснавання. І амаль да самай смерці розныя куткі “яго” заказніка заставаліся самымі любімымі і  пад час іх наведвання Жорж быў або задаволены з нечаканай ці доўгачаканай сустрэчы з “мясцовымі жыхарамі”-жывёламі, або засмучаны з-за стратаў у мясцовай расліннасці або жывёльным свеце…

каманда "Гарадзенскія"

Жорж Гулеўскі ў складзе каманды "Гарадзенскія", Birdrace-2013

Актыўна прымаў удзел у жыцці Гродзенскага абласнога аддзялення АПБ: улічваў вяртлявых чаротавак на балоце Грайна, удзельнічаў у многіх гонках за птушкамі (Birdrace`ах), Сусветных днях назірання, фотавыставах, пісаў у абласны бюлетэнь "Кабец" і іншых нашых справах...

Гулеўскі

З прадстаўнікамі маладзейшых пакаленняў гарадзенскіх арнітолагаў на Гродзенскай абласной канферэнцыі АПБ, 2014 год

Георгій Васільевіч быў сябрам Усесаюзнага арніталагічнага таварыства (ВОО), потым сябрам Беларускага арніталагічнага таварыства (БАТ) і Заходне-Беларускага таварыства аховы птушак (ЗБТАП). Пасля заснавання ў 1998 годзе, быў актыўным сябрам АПБ, з 2006 году - ганаровы сябра гэтай грамадскай арганізацыі.

Савет Гродзенскага абласнога таварыства АПБ вырашыў прысвяціць сваю сёлетнюю канферэнцыю, якая адбудзецца 25-26 лютага, памяці Георгія Васільевіча Гулеўскага.

Светлая Табе памяць, Жорж! І няхай справа Твая жыве.

 

Сябры і калегі

 

Гулеўскі

 

Выкарыстаны здымкі Huns`a Hut`a, Мікалая Гулінскага, Ірыны Самусенкі, Дзьмітрыя Вінчэўскага, з архіва Георгія Гулеўскага

Comments