Пугачы + VIDEO

 У мінулым годзе было знойдзена гняздо пугача, у якім было тры птушаняці. Два з іх акальцаваны, аднаго мы не знайшлі - падрабязней гл. тут:

 Филины  +  Кольцевание филинов

Сёлета у сакавіку на гэтай жа тэрыторыі пачулі зноў пугача, а першага траўня я паехаў шукаць гняздо…

 http://youtu.be/2FZSBkn4xwI  

У мінулым, 2012 годзе, птушанят знайшоў выпадкова. Цяпер мэта была канкрэтная - знайсці гняздо пугача з птушанятамі. Паехаў пад вечар, калі ў лесе ціха і спакойна, толькі спявае шматлікая птушыная дробязь. Адразу пайшоў да таго месца, дзе ў мінулым годзе было гняздо. Вось і яно. Рэшткі мінулагодніх ахвяр толькі і нагадваюць, што тут некалі сядзелі грозныя начныя драпежнікі. Прахожу трохі далей, ў лес і ужо чую берасцянак. Птушкі не спяваюць, яны хвалююцца. Характэрнае “пінь-пінь” падказвае, што птушачкі бачаць ворага. Гэта дадае мне аптімізму і я працягваю пошук. 

 Праз некалькі хвілін падае голас дарослы пугач. Я ужо ведаю, што гэта менавіта яна, а не ён:  голас у самкі сіплы, нейкі прыглушаны. Іду на гэтыя гукі. Праз дзесятак – другі метраў бачу птушку. Яна зляцела з сасны, праляцела і села на іншае дрэва. Бачу яе і адзначаю, што яна не вельмі хвалюецца. Так, - значыць трэба вяртацца, ісці ў супрацьлеглы бок. Што і раблю. Вось тут, прайшоўшы сотню метраў, разумею, што шлях выбраў я правільны: дарослая птушка ўжо не “сіпіць”, яна крычыць ў голас! Яе звонкае “кек-кек”, “кек-кек” разносіцца па лесе. Птушка пралятае недалёка ад мяне, я яе добра бачу. Да слова - гэта не зусім характэрныя паводзіны для пугача. Звычайна дарослыя на вочы людзям не паказваюцца.  

 Па мінуламу году я ўжо ведаю, што набліжаюся да птушанят. Мала таго – яны зусім блізка, аб чым сведчаць паводзіны дарослай птушкі. Праз тры – чатэры хвіліны бачу і гняздо. Птушаняты сядзяць каля камля сасны, прыціснуўшыся адзін да аднаго. Іх два, на аднаго менш, чым летась. Хутка аглядаю іх, раблю фота і пакідаю гэтае месца.  Дадам толькі, што ад моманту ўваходу ў лес да знаходкі гнязда я патраціў роўна паўгадзіны. 

Праз тыдзень мы с сябрамі наведалі гняздо, каб акальцаваць птушанят, сабраць рэшткі ахвяр. Быў я не адзін, таму дарослая птушка зляцела ад птушанят, але голас падавала  толькі сіплы. Яе мы заўважылі і пачалі шукаць птушанят. Гняздо  птушаняты ўжо кінулі, ў ім засталіся толькі рэшткі шматлікіх ахвяр. Так і павінна быць: птушаняты соў пакідаюць гняздо яшчэ не умеючы лётаць.  

 Пачалі круг за кругам абыходзіць месца, дзе павінны быць птушаняты. Адзін, старэйшы, сядзеў у сасны метрах ў дваццаці ад гнязда. Трохі далей знайшлі і другога. Птушанят, як і планавалі, акальцавалі. Сабралі рэшткі ахвяр. Харчаваліся пугачы рознымі птушкамі. Тут былі і качка-крыжанка, і шызы голуб, і нават вушастая сава і шуляк-карагольчык. Млекакормячыя таксама былі прадстаўляны. Знайшлі рэшткі пацука, вожыка. За пацукамі і галубамі пугачы лётаюць на суседнюю ферму, яна прыкладна ў 1,5 кіламетрах ад гнязда.