Шэрая варона і вусені "пра запас"

Дакументацыйныя здымкі і відэа

Калі я ўбачыў амаль пасярэдзіне дарогі, замошчанай пліткай, шэрую варону (Corvus (corone) cornix), якая яўна нешта даставла з невялікай шчыліны, у мяне ў галаве хутка 'пракруціліся' варыянты, якія я ўжо бачыў раней: варона дастае першы раздаўлены грэцкі арэх адтуль? дастае дажджавых чарвякоў, якія вылезлі з-за дажджоў рассяляцца і засохлі па дарозе?

Але як гэта бывае з варонамі, птушка ізноў мяне здзівіла. Усё аказалася інакш, але не менш цікава:

Аказалася, што варонка прынесла аднекуль трох чорных вусеняў і прыдумала, што іх можна схаваць у вышчэрбліну паміж пліткамі. Але гэта яўна не была супер-схованка, пра якую я пісаў ТУТ. Ці то тыя вусені сталі вылазіць са схованкі самі, ці то варона адразу зразумела, што месца яўна не найлепшае сама, аднак далей адбывалася тое, што я і ўбачыў. Ніікуды не адляцеўшы, варона дастала жывую здабычу і акуратна сабрала яе ў дзюбу. А потым прыхавала пад скошанай травой на ўзбочыне, метрах у 10 ад першага месца. Ды яшчэ і зверху траву паклала. Каб надзейней было)

Адразу пасля гэтага, не губляючы часу, пайшла шукаць іншую ежу ўздоўж ходніка, хаця, здавалася, не была галодная - інакш навошта было тых вусеняў хаваць?

Гродна, 29-08-2021

Аўтар - Дзьмітры Вінчэўскі