Зімародак у снежні

Дакументацыйныя здымкі і відэа

У апошнія дні ўзровень вады ў Нёмане значна знізіўся, асабліва ж заўважна гэты стала ў вучці прытоку Нёмана - Гараднічанцы.

Усе тыя прысады, якія зімародкі (Alcedo atthis) ахвотна выкарыстоўвалі для адпачынку і рыбалкі летам, зараз таксама апынуліся над вадой. Вада ў рэчцы стала празрыстай - чаму б ім зноў не рыбачыць тут? - падумаў я, калі падыйшоў да вусця Гараднічанкі.

Як раз недзе каля самай вады зімародак зляцеў і павярнуў за трыснёг на Нёман. Сядзеў ён вельмі нізка, лавіць рыбу з такой прысады яўна было б нязручна, і я вырашыў зрабіць для птушак нешта лепшае. Заадно і сам скарыстаюся - паздымаю, калі зімародкі прысаду ацэняць як добрую.

Я перайшоў мосцік і на другім беразе Гараднічанкі знайшоў 2 сухія абломаныя галіны. Адна яўна не пасавала на прысаду, другую ж, выгнутую, я замацаваў каменнямі на беразе над вадой так, каб яна не круцілася і "ляжала" пад добрым вуглом.

Прыкладна праз хвіліну-дзве я вярнуўся на "наш" бок рэчкі і ад здзіўлення і захаплення адкрыў рот - на маёй толькі што пастаўленай прысадзе ўжо сядзела самка зімародка! - гл. ніжэй першы здымак.

Самка адрозніваецца ад самца ружова-аранжавай плямай на паддзюб'і, у самца ж уся дзюба чорная.

Я пачаў здымаць птушку, хаця яўна было зацёмна для добрых здымкаў, але праз некалькі секунд яна пераляцела вышэй і спачатку села бокам на тонкія вертыкальныя галінкі канадзкага клёна на беразе побач, а потым і на амаль гарызантальныя на дрэўцы яшчэ вышэй:

https://youtu.be/wAwTpQaoQgA