Тры лескі-завірушкі

Своеасаблівасць паводзін усіх нашых лесак як групы ў тым, што яны не любяць 'свяціцца' і стараюцца трымацца розных зараснікаў і калі спяваюць, і калі займаюцца іншымі важнымі справамі. Адзінае выключэнне - шэрая леска, але і яна звычайна паказваецца на вяршалінах раслін параўнальна нядоўга.

Лескі-завірушкі (Sylvia curruca) як раз 'тыповыя' па паводзінах лескі, хутка перамяшчаюцца паміж галінамі і галінкамі і з лістамі, і без лістоў, часам як камень падаюць некуды ўніз і адкрыта спяваюць і паказваюць сябе параўнальна рэдка і нядоўга. І калі першыя тыдні пасля прылёту іх гучную і хуткую песеньку можна часта пачуць з густых кустоў і невысокіх ці ніжніх частак дрэваў, то потым, калі пара ўжо створана, самец займаецца больш важнымі справамі і пра спевы ўспамінае толькі зрэдку.

Так было і ў тым месцы, дзе я назіраў за імі  з сярэдзіны красавіка. На даволі вялікім участку з рознымі дрэвамі і густымі кустамі самцу найбольш спадабаліся моцна пераплеценыя і густыя пабегі дзікага вінаграда. Прыкладна палову часу ён праводзіў там і там яго было найлягчэй сфатаграфаваць. Паступова ён амаль перастаў спяваць, але адным днём у пачатку мая нешта змянілася і хутка я зразумеў што і чаму.

На яго тэрыторыі з'явіўся іншы самец, прычым гаспадар ганяўся за ім па ўсяму свайму ўчастку, зусім побач лятала і самка (інакш я прысутнасць трэцяй лескі інтэрпрэтаваць не магу). Акрамя хуткіх і частых пагоняў, гаспадар ізноў пачаў часта спяваць, сядаючы ў розных месцах. І нават я зразумеў: усё тут ужо занятае! )

Аднак праз некалькі секунд чужак паказваўся недзе побач і хуткія пераследаванні-пагоні раз за разам чарадаваліся з частымі спевамі. Працягвалася ўсё гэта каля гадзіны, трэцяя леска прапала таксама раптоўна, як і з'явілася. І ў наступныя дні пачуць песню завірушкі ці ўбачыць яе (яго)  ізноў стала нялёгка.

30.04-09.05.2022, Гродна

Аўтар - Дзьмітры Вічэўскі